Zabalegi- Mujika bikoak ez zuen hutsik egin, eta 40-28 irabazi zion REMO Bayonnais taldeko Bacardatz-Casaing bikoari. Faboritoak ziren Ametsakoak, baina hasera estua izan zuen partidak; erdira arte lapurtarrek estu hartu zituzten irurarrak. Hemendik aurrera huts gutxiago eta joko sendoagoa egiten hasi ziren Ametsakoak, eta poliki-poliki markagaikuan aldea egiten hasi ziren, 40-28 azken emaitza lortu arte.
Bigarren partidan, Isasa-Iturbe bikoak 40-36 galdu zuen Angeluko Hardoytarrak taldeko Ondarts-Barneix bikoaren kontra. Hasera ona eman zioten irurarrek partidari, baina poliki-poliki beherantz egiten hasi ziren, eta angeluarrak gorantz. Horrela, partidaren azken hamarkadara parean iritsi ziren. Edozer gerta zitekeen, baina angeluarrek zuzen, hutsik egin gabe jokatuz, eta zorte apur batekin, heuren aldera eraman zuten partida. Pena handia zuten Ikerrek eta Oierrek, irabazi beharreko partida zelako.
Igandean, Hazparnen jokatutako partidan Mendizabal-Huitzi bikoak 40-38 irabazi zien Noizbait taldeko Bonetbelche-Francesena bikoari. Irurarrak ziren faborito, baina etxean jokatzeak beti ematen du abantail txiki bat, eta hori baliatu zuten hazpandarrek irurarrak estu hartzeko. Ez ziren ondo moldatu trinketera, eta estu eta larri ibili ziren irurarrak, heuren jokoa egin ezinik partida osoan zehar, eta ohi baino huts gehiago eginez. Hala ere, partida irabaztea lortu zuten, eta horrekin geratu ziren Ametsakoak.