Ostiralean, Iparraldeko Ligako Gaztetxoak mailako lehen jardunaldia jokatu zen Irurako Ametsa trinketean. Lehen partida, Ametsa 1 (Maiza-Lopetegi) bikoa eta Ametsa 2(Murua-Aristi) bikoaren artekoa izan zen.
Oier Maiza eta Xuban Lopetegi bikoa nagusi izan zen hasieratik, eta 30-11, erraz, irabazi zuten. Adur Murua eta Aitor Aristi saiatu ziren, baina ezin izan zuten gauza handiegirik egin, Oier eta Xubanen joku sendoaren kontra.
Bigarren partidan ere Oier Maizak eta Xuban Lopetegik jokatu zuten. Oraingoan, Ibai Larrañaga eta Aimar Herasen kontra. Partida hau ere nahiko erraz, 30-16 irabazi zuten. Hala ere, Ibaik eta Aimarrek ez zizkieten gauzak erraz jarri, ondo jokatu zuten, eta emaitzak erakusten duena baino lan gehiago egin behar izan zuten. Ibai Larrañagak (11 urte) bere estraineko partida zuen maila honetan, eta xarez jokatzeko dohaiak badituela erakutsi zuen.
Arratsaldeko hirugarren partida, Gazteak mailako bigarren jardunaldiko, Iker Isasa-Oier Iturbe irurar bikoa eta Irurako Gazteak mailako 1. Xare Irekia irabazi zuten Oxan Halsouet eta Jakes Vila bikoaren artekoa izan zen; hauek, pronostikoak betez, 40-23 irabazi zuten. Oxanek eta Jakesek erakutsi zuten berriro ere, maila handiko bikoa osatzen dutela, eta hauei irabazi nahi dietenek asko eta ondo jokatu beharko dutela. Iker eta Oier oso gaizki, urduri, hasi ziren, eta Urruñarrek berehala hartu zuten aldea. Partida galduta ikusi zutenean, lasaitu ziren apur bat irurarrak, eta pilota aldaketarekin, eta trinketera hurbildu zen zale gazteen animo eta bultzadarekin, markagailua apur bat itxuratzea lortu zuten.
Igandean, Ametsa 2ko Mendizabal-Huitzi bikoak 40-24 irabazi zien Donapaleuko Amikuze Elkarteko Arhie-Tartas bikoari, Nafarroa Behereako Orégue herrian.
Partidak hasera parekatua izan bazuen ere, berehala irurar bikoak 10 tantutako aldea lortu zuen, eta partida osoan alde horri eutsi, eta amaieran handitzea ere lortu zuten.