Larunbatean, urriak 2, Xare Irekien finalak jokatuko dira Irurako Ametsa trinketean. Lehen finala, 17:00etan, I. Gazteak Xare Irekikoa izango da. Urruñako Halsouet-Vila bikoak, Zabalegi-Mujika irurar bikoaren kontra jokatuko du. Urruñarrak dira faborito, txapelketa osoan erakutsi duten nagusitasuna nabarmena izan delako. Hala ere, ibil daitezela kontuz Urruñarrak, Ametsako bikoa moralez gainezka eta jokoz ondo dagoelako, eta dakitena jokatu eta estrategiarekin asmatzen badute, aukeraren bat izan dezakete txapela irabazteko. Gainera, herritarren animo faltarik ere ez dute izango, etxean jokatzen dute eta. Aurkariak izan ezik, dena alde dute irurar gazteek.
Final nagusian, III San Migel Xare Irekian, Larronde-Etxebest bikoak Borteyru anaien kontra jokatuko du. Faborito argirik ez dago, bikote biek, jokoari dagokionez, txapelketa nahiko parekatua egin dutelako. Hala ere, pilotari guztiek euren maila ematen badute, ikusgarria izango da partida, lau pilotariek daukaten maila izugarria baita. Hortaz, ikuskizuna bermatuta dauka larunbatean Irurako Ametsa trinketera xareko jaialdi bikain hau ikustera hurbiltzen denak.