I. Irurako Xare Irekien eta Xareko Gipuzkoako Txapelketen finalerdi irekiak jokatuko dira larunbatean, 10:00etan, Irurako Ametsa trinketean.
Gaztetxoekin emango zaio hasera jardunaldiari, eta Murua I-Calonge bikoak Gibelalde-Etxeberria bikoaren kontra jokatuko du. Ligaxkako lehen partida jokatu zuten elkarren kontra, eta lehenek nahiko erraz irabazi zuten, baina bigarrenek gora egin dute azken partidetan, eta norgehiagoka lehiatua aurreikusten da, faborito argirik gabe.
Gazteak mailakoen txanda izango da segidan, , eta Maiza-Heras bikoak Mendiluze-Lopetegi bikoaren kontra jokatuko du. Ligaxkako azken partidan, Maizak eta Heras izan ziren garaile, baina hau ere partida lehiatua izatea aurreikusten da.
Emakumezkoak mailakoa izango da hirugarren partida, eta hemen ere ez dago faborito argirik. Hiru bikotek parte hartu dute Irekian, eta partida bana irabazita, aberageak erabaki du finalera nor, eta finalerdia nortzuek jokatu. Eta hau, Goenaga-Fernandez eta Galartza I- Isasa bikoen artekoa izango da.
Jubenilak mailako Xareko Gipuzkoako Txapelketakoa izango da jardunaldiko azken finalerdia. Bertan, Zabalegi-Iturbek Montero-Huitziren kontra jokatuko dute. Hemen ere faborito nor den esatea ez da erraza. Zabalegi-Iturbek ligaxka hobea osatu dute, baina finalerdiak dira, eta pilotarien egunaren arabera, emaitza oso desberdina izan daiteke; Montero-Huitzi bikoa oso arriskutsua da partida bakarrera.