Lopetegi-Karrikaburu eta Etxeberri-Funosas bikoek jokatuko dute larunbatean, urriak 3, 17:00etan, II. San Migel Xare Irekia/ Irurako Udala Sari Nagusiaren finala Irurako Ametsa Trinketean.
Bi bikoteek ez dute oraindik elkarren aurka jokatu Xare Irekian, eta faborito argirik ez dago finalerako.
Lopetegi - Karrikaburu bikoak jokatutako partida guztiak irabazi ditu, eta, nahiko erraz, gainera. Nagusitasuna, ez markagailuan bakarrik, jokoan ere erakutsi dute. Horregatik esan daiteke Etxeberri-Funosas bikoa baino faboritoagoa dela Lopetegi-Karrikaburu bikoa.
Etxeberri-Funosas bikoak ez zuen ondo hasi Xare Irekia, lehen partida nahiko erraz galduz. Baina Xare Irekiak aurrera egin ahala, gorantz egin du, eta finalerdia joku bikaina eginda irabazi dutela kontuan izanda, erne ibili beharko du Lopetegi-Karrikaburu bikoak.
Finalean elkarren arerio izango diren Joxi Lopetegi, herritarrak, eta Mikel Funosas Hazpandarrak, elkar ondo baino hobeto ezagutzen dute. Azken urteetan xareko bikoa izan dira eta dira egun, eta ez nolanahikoa; Munduko biikoterik onena osatu dute. Ondorioz, bakoitzak bestearen bertuteak eta gabeziak ondo baino hobeto dakizki, eta norbera hori baliatzen saiatuko da II. San Migel Xare Irekiaren txapela preziatua janzteko. Bi horien bikoetekideak ere pilotari bikainak dira. Etxeberri , gaztea eta etorkizun handiko pilotari indartsua da, eta aukera duenean izkutatu egiten du pilota, izugarrizko abiadura emanez. Karrikaburu, aldiz, jokalari teknikoagoa da. Ez dio halako abiadurarik ematen pilotari, baina segurua da, eta berari tantua egitea kosta egiten da. Bi bikoteak orekatuak direla kontuan izanda, final parekatua eta borrokatua aurreikusten da.
Finalaren atarikoan, Herriko neska xarelarien erakustaldia izango da ikusgai. Lan bikaina egiten ari dira Naroa, Nahia, Nora, Irati eta Maider, emakumeek ere xarean joka dezaketela erakusteko ahalegin handia eginez. Heurak dira gaur egun xarean jokatzen duten emakume bakarrak munduan. Hori dela eta, merezitako omenalditxoa egingo diegu, eta munduko xare jokalari onenen telonerak izateko aukera izango dute larunbatean, 17:00etan, Irurako Ametsa Trinketean.
Koronabirusa dela eta, Trinketearen edukiera mugatua izango da, eta dagoeneko ez dago sarrerarik partida zuzenean ikusteko. Partidak internet bidez ere ikusi ahal izango dira.