Ostiralean, otsailak 21, hasiko da Hazparneko Trinkete Berrian mutilen mailako xareko mastersa. Iparraldeko 7 bikotek, hegoaldeko bikote batek eta hegoalde-iparraldeko bikote misto batek parte hartuko dute bertan. Hala ere, otsailaren 21ean, 18:30ean, notizia, inaugurazio eguneko atariko partidan dago; Iparraldean, historian lehen aldiz, nesken arteko xareko partida bat jokatuko baita. Naroa Goenaga, Nahia Gorriti, Nora Galartza eta Irati Fernandez , Irurako neska xarelariek izango dute ohore hori. Irurako neska xarelariak historia egiten ari dira, eta ostiral honetan beste urrats historiko bateko protagonista bilakatuko dira. Lehena, Iruran, xarearen mendeurrenaren egitasmoaren barruan, historian lehen aldiz jokatu zen nesken arteko xare partida izan zen. Orain, berriz, xarearen seaskan, Iparraldean, jokatuko dute. Iparraldeko Euskal Pilota Ligako arduradunek, nesken xareari bultzada eman nahi ziotela eta, xarez jokatzen den torneorik garrantzitsuenean, Xareko mastersean, alegia, atariko partida jokatzeko gonbidapena luzatu zien Ametsa Pilota Elkarteko neskei. Ilusio handia egin zien gonbidapenak Irurako neskei, eta zalantza izpirik gabe, onartu egin zuten. Ondorioz, pilotaren eta, bereziki, xarearen historian sartzeko urrats berri bat emango dute, Naroa Goenaga-Nahia Gorriti eta Nora G alartza-Irati Fernandez bikoek, ostiralean, otsailak 21, 18:30ean, Hazparneko Trinkete Berrian jokatuko duten nesken arteko xare partidarekin.
Gora pilota, gora xarea eta gora neska pilotariak!!!