Larunbatean, irailak 14, I. San Migel xare irekiaren 2. jardunaldia ez zen ehuneko ehunean jokatu. Lehen partida amaitu eta gero, 2. partida hasi aitzin, pilotariak berotzen ari zirela, pilotakada bortitz batek, erreboteko kristalaren zati bat hautsi egin zuen, eta, ondorioz, 2. partida bertan behera gelditu zen.
Lehen partidan, Driolet-Etxeverrik 40-34 irabazi zieten Bortheiru II-Funosasi. Partida orekatua izan zen, batzuek zein besteek alde txikiak izanez. Partidaren azken hamarkadan, galtzaile izan ziren Bortheiru II-Funosas, 31-34 irabazten jarri ziren, baina 9-0 azken partziala eginez, Driolet-Etxeverri bikoak, partida irabazi zuen.
I. San Migel Xare Irekiak, gaur gaurkoz, izango duen bilakaeraz ezin da ezer aurreratu. Zaila izango da Xare Irekia iragarritako egunetan aurrera eramatea, baina ahaleginak eta bi egingo dituzte , bai antolatzaileek bai Udalak. Ea lehenbailehen hautsitako kristala konpondu eta Xare Irekiarekin jarraitzeko aukera dagoen.