Murgil gaitezen hamarkada bat
joan den errepasoan
nostalgiari bide emanez
ur handietako soan
behin traineru bat ureratu zen
helburu umil jasoan
elkar hartuta babestu ginen
olatuen erasoan
urmael gisa amaitu zuen
amets baten itsasoan.
Tolosaldeko Arraun Klubean
emakumeak gidari
babor, estribor, proa ta popa
ta tostak indar emari
berriz martxan da Tolosaldeko
hainbat neska arraunlari
lotu estrobo denak sendo ta
ekin dio bideari
urak astinduz ta paladaka
bigarren loraldiari.
Nola uztartu antolaketa
ta taldearen desira
ziaboga bat hartu beharrak
eman bazion segida
Getaria ta Tolosa batuz
bete zen espektatiba
ekaitz ondoko barealdia
badatorrela argi da
itsasoari bizkar emanez
baina aurrera begira.
Behin toletea okertzen bada
arrauna doanez ihes
urak bezala bakoitzak bere
bidean egin du trabes
berriz sortu ta abiatzea
harturik taldean amets
Koteli eta Miguel gurekin
dira berriz bide batez
gugan sinistu duzuelako
eskerrik asko bihotzez.