MUGA ospakizunaren sorburua den idatzian (1025), aipatzen diren lursail eta ondasunen artean, ugariak dira sagastiei egindako aipuak. Hori dela-eta, sagarrak, sagastiak eta sagardoak historian izan duen garrantziaz jardungo gara; bi hitzaldi eskainiko dira lehenik eta, gero, etorkizunari buruzko mahaingurua izango dugu:
10:00etan, Sagardogintzaren garrantzia gure historian hitzaldia eskainiko digu Xabier Alberdi Lonbide (Zarautz, 1969). Historian lizentziatua da, Albaola Elkarteko ikerketa zuzendaria eta Donostiako Itsas Museoko zuzendari zientifikoa.
10:50etan, Baserriak eta sagardogintza Altzon gaia jorratuko du Lourdes Odriozola Oiarbidek (Errenteria, 1964). Historian doktorea da, eta Gipuzkoako herri, lanbide eta usadioen ikerlari aditua.
Bi hitzaldien ondoren, bertaratutakoek izango dute beren galderak egiteko edo gogoetak partekatzeko tartea. Gero, atsedenaldi labur bat egin eta, 12:00ak aldera, etorkizunaz hausnartzeko mahaingurua izango dugu. Gaia: Sagardogintza etorkizunean. Gonbidatuak: Maite Retolaza Ojanguren (Elgeta, 1975), Zeraingo Oiharte sagardotegiko burua; Olatz Mitxelena Garmendia (Astigarraga, 1991), Gipuzkoako Sagardogile Elkarteko koordinatzailea; eta Unai Agirre Goia (Hernani, 1975), Euskal Sagardoa jatorri deiturako koordinatzailea. Gidaria: Felix San Sebastian Rezola (Altzo, 1972), Zuaznabar baserriko sagastizalea.
Hori izango da goizeko ekitaldia. Arratsaldean, 19:00etan, Elordi Elkartean, SAGARDO DASTAKETA egingo dugu Elordi Elkartean. Euskal Sagardoa jatorri deitura elkartearen eskutik antolatu da, eta Mikel Garaizabal adituen azalpenak lagunduko digute sagardoa hobeto ezagutzen. Irekiak dira goizeko nahiz arratsaldeko ekitaldiak. Gonbidatua zaude.