Jardunaldi guztietan jarraituko zaion egiturari loturik, ibilbide historikoa ezagutzeko bi hitzaldi eskainiko dira lehenik eta, ondoren, mahai ingurua izango da etorkizunaz gogoetatzeko. Eskuarteko gaia jorratzeko adituak izango ditugu bidelagun. Hau da egitarau zehatza:
10:00etan, XI. mendeko testuinguru sozio-politikoaz mintzatuko zaigu Josu Narbarte (Irun, 1992), Arkeologian doktorea eta Arantzadi Zientzia Elkarteko arkeologia saileko kidea.
11:00etan, Erakundetzea historian zehar gaia jorratuko du Gaizka Arangurenek (Iruñea, 1967); kazetaria eta Euskal Herriaren historian aditua dugu bera.
Atseden txiki bat egingo dugu eta, ondoren, 13:30ak bitartean, etorkizunaz gogoeta egiteko mahai inguruari ekingo zaio. Etorkizunean estatus berria? izango dute gaia, eta Maddi Alberdi (Eibar, 1999) EHUko doktoregaia eta Parte Hartuz ikerketa taldeko kidea gehituko zaie aipatutako bi hizlariei. Haritz Azurmendik (Albiztur, 1991), Gizarte Zientzietan doktore eta Jakin taldeko kideak, gidatuko du eztabaida.
Irekiak daude jardunaldiak jakintzara eta hausnarketara guregana bildu nahi duzuen guztiori; ez dago aurrez izena eman beharrik, eta ongietorriak izango zarete bertaratzen zareten guztiak. Zatozte eta begira diezaiogun joandako milakoari, eta hausnartu datozen milak eraikitzen jarraitzeko.