Martxoaren 23an, ordubata inguruan, igaroko da Korrika Altzoko lurretatik, Borda baserri ingurutik Artzabaltza ingururaino doan bide-gorritik. Gustatzen zaigu, baina, aldez aurretik helduen euskalduntzearen aldeko ekimen honen aldeko giroa sortzea, dela euskal kultura sustatuz, dela herritarrak bildu eta beren ekarpena egiteko aukerak eskainiz.
Horietako ekitaldia izango da datorren igandekoa: Arimaz orkestaren kontzertua izango da Altzo-muinoko elizan, 12:00etan, eta, ondoren, 13:00ak aldera, festa giroa jarriko dugu herriko plazan: Korrikaren materiala eskuratu ahal izango da, herritarren artean kilometro bat erosteko ekarpena egiteko aukera egongo da, eta baita Elordi Elkarteak prestatutako pintxoak dastatzeko ere. Biltzen den guztia herritarron artean kilometro bat erostera zuzenduko da.
Anonymus Popular izan genuen joan den ostiralean, aurkeztu dizuegu datorrena, eta Korrika hurbildu hala izango ditugu ekimen gehiago: Imaz Bertsolaria Eskolak antolatutako Korrika Txikia martxoaren 21ean arratsaldean eta Bizkarsoro pelikula martxoaren 22an iluntzean. Nola ez, bidean izango gara martxoaren 23an. Helduen euskalduntzean murgilduta dauden guztien ahaleginaz harro!