San Inazio Jaiak 2016

XX. Frontoi Zaharreko txapelketak baditu txapeldunak

Erabiltzailearen aurpegia Altzoko Kultura Batzordea 2016ko abu. 1a, 19:55

Altzoko festetako egitarauan iragarri bezala gaur jokatu dira hiru finalak. Jai giro ederra izan dugu eta Eneritz Agirre-Harkaitz Murua txikienetan, Ainhoa Uzkudun-Haritz Esteban gaztetxoetan eta Pello Olano-Mikel Goitia nagusietan izan dira irabazleak lehia estuak jokatuta.

Ekainaren 27az gero ederki astindu dituzte herriko pilotariek Altzo Muinoko elizaren horma zaharrak. Miatu dituzte horko koska eta pilare okerrak eta giro ederra jarri dute uda honetako arratsalde askotan. Gaur, Elordi Elkartean muslariak mus, enbido, paso edo ordago ari ziren bitartean, pilotariak gogor aritu dira ikuslez inguratuta; jende asko bildu da partidak ikustea eta giro bikaina izan dugu plazan. Txiki eta gaztetxoen partidak estuak izan dira oso.

Txikienetan, Eñaut Elduaien eta Harkaitz Muruak 16-15 irabazi diete Saioa Goitia eta Mikel Iturriotzi. Tantoek erakusten duten bezala, oso partida estua jokatu dute eta azken tantoan erabaki da guztia.

Gaztetxoetan, Ainhoa Uzkudun eta Haritz Estebanek 18-17 irabazi diete Eneritz Agirre eta Amets Uzkuduni. Partida ezin estuagoa hau ere; 15-17ko abantailarekin iritsi dira galtzaileak azken tantoetara, baina ez dute bukatzen asmatu.

Nagusietan, Pello Olano eta Mikel Goitiak 22-18 irabazi diete Ander Azurtza eta Mikel Artolari. Akats gehitxoko partida izan da baina behin baino gehiagotan lortu dute ikusleen txalo zaparra jasotzea.

Sari banaketa eta partaide guztien arteko argazki saioarekin amaitu da aurtengoa. Eskerrik asko partaide guztiei.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!