Neurri zaharren erakusketa izan nahi zuena, garai bateko etxe barru eta kanpoko lanetarako lanabesen erakusketa bihurtu zaigu. Herritar askok miatu ditu bere etxeko bazterrak eta erakusgarri jartzeko ekarri dituzte lakariak, gaitzeruak, anega-erdiak, kanak, kordelak, pisu erromatarrak... neurri zaharrak. Baina baita sukaldeko, logelako, ukuiluko, egurra lantzeko eta beste lanabesak ere. Argazkiak, eskritura zahar eta bestelakoak ere bai.
Polita eta hunkigarria izan zen zabaltze ekitaldia. Aretoa herritarrez - haur, gazte eta zahar- bete bete eginda, han ibili ginen txokorik txoko -sukaldetik ukuilura, ukuilutik sorora ...- erakusgarri jarritako gauza guztien izen eta horien inguruko istoriotxoak entzunez Bodaberriko Joxeri, Tokialaiko Joxemari eta Juanitari, Artzaungo Josepari, Garmendianeko Joxemanuel eta Lurdesi, Arretxeko Maria Pilarri, Berakoetxeko Joxepa eta Garbiñeri, ... Eta guztia dotore antolatuta, ikusgarri!
Ikusi nahi duzuen guztiak gonbidatuak zaudete Batzarremuinora. Hona irekita egongo den egun-orduen zerrenda:
Abenduaren 16, 17, 18 eta 19an, 18:00etatik 20:00etara
Abenduaren 20an, 10:30etaik 14:00tara eta 16:00etatik 20:00etara
Abenduaren 26an, 16:00etatik 20:00etara
Abenduaren 27an, 10:30etaik 14:00tara eta 16:00etatik 20:00etara
Urtarrilaren 2an, 16:00etatik 20:00etara
Urtarrilaren 3an, 10:30etaik 14:00tara eta 16:00etatik 20:00etara
Etorkizunean dugu mira, baina ezin eman bizkarra iraganari, hau da gure patua:
Tresna isila, joanaren ezkila,
beti higandik ihes, beti hire bila...