Altzo Muinoko eliz-horma zaharrari begira dagoen frontoi irekian jokatzen da. Horma zulo-koskadun eta pilare okerrak, albo-gain libre eta trabarik gabeak, eta elizako teilatura bota arte gora jotzea libre izatea dira bertako berezitasunak. Hiru maila bereizten dira, eskuz jokatzen da pilota gozoekin, eta neskak zein mutilei dago irekia. Nagusietan urte batzuk badira neskek parte hartzeari utzi ziotela, mutilen kirtenkeriekin ikaratuta-edo. Hemeretzigarrenean 19 bikotek eman dute izena. Gaur jokatuko dira ligaxketako lehen partidak. Hauek amaituta, kanporaketak jokatzen hasiko dira finalak erabakita utzi arte. Finalak, herriko festetan jokatuko dira, abuztuaren 2an. Bitartean, ia arratsaldero, ziurtatua dugu festa giroa herriko plazan. Imanol Urbietak kantatu zuen: haurrak ikas zazue euskaraz mintzatzen, ongi pilotan eta oneski dantzatzen. Aire txun txikitun ... Badatoz herriko festak.