Urtetik urtera, gero eta norvegiar gehiagok parte hartzen dute, Euroloppet zirkuituan sartuta baitago proba hau. 2016an, adibidez, Europako Distantzia Luzeko Txapelketa bertan egiteko asmoa dago.
Larunbatean, lasterketa lehiatzeko aukera bai izan zela Bereten. Distantzia Luzeko Espainiako Txapelketa jokatu zen, eta Alpino Uzturreko kideak bertan izan ziren. Partaide horien artean Irati Izagirrek lortutako bigarren postua izan zen azpimarragarriena, Junior I kategorian, 15 kilometroko skating lasterketan.
Bestalde, Eslovakian jokatu den Universiadan, Imanol Rojo aritu da lehian, eta pozik geratu da tolosarra. 30 kilometroko skating proban hamahirugarren egin zuen Rojok. Abendutik arnas arazoekin dabil eskiatzaile tolosarra, eta tratamenduan egon da. Aurreko asteazkenean 10 kilometroko klasikan atera zen, eta sufritzea tokatu zitzaion Rojori. Astelehenean, ordea, skating estiloan gustura ibili zen. 25. kilometroan taldeburuan joan zen. Horrez gain, Munduko Koparako sailkatu da tolosarra, Universiadan lortutako puntuei esker.