Onddo budina

Has gaitezen. Onddoak eta tipula batera kozinatu ditzakegu. Hau da, budinerako eta saltsarako erabiliko ditugu bi osagaiak, baina, momentu zehatz batean, kantitateak banatuko ditugu; parte batekin budinarekin jarraitzeko eta bestearekin saltsarekin segitzeko. Guztira kilo bat onddo, litro eta erdi esne-gain eta tipula eta erdi erabiliko ditugu.

Lehenik eta behin, barazkiak mozten hasiko gara. Hau da, tipula zuritu eta moztuko dugu, eta zartagin batean gatz pittin batekin erregosten jarriko dugu. Behin tipula egiten hasten denean, onddoak garbituko ditugu. Gogoratu, onddoa ez dela urarekin garbitu behar, bestela hezetasuna hartuko luke-eta. Pintzel edo laban baten laguntzaz garbituko ditugu gure onddoak. Jarraian zati txikitan zatituko ditugu, eta tipula egiten gauden zartaginera gehituko ditugu. Hor utziko ditugu su-eztitzen, guztiz eginda gelditzen diren arte. Marroixka kolore batekin geratuko dira; momentu honetan gatz puntua probatu dezakegu. Dena ondo egonez gero, errezetaren lehen partea prest izango genuke.

Hurrengo pausorako basodun irabiagailu bat erabiliko dugu. Onddo guztiak bertara botako ditugu. Momentu honetan esne-gaina gehituko dugu. Honenbestez, saltsa moduko bat prest izango genuke. Saltsa gisa erabiliko dugun partea beraz, erreserbatuko dugu. Eta gainontzekoarekin budina egiten jarraituko dugu. Hau da, nahasketa irabiagailuan prest dugula, bost arrautzak gehituko dizkiogu.

Labearen garaia dator segidan. Labea 180 graduan piztuko dugu eta maria bainuan deiturikoan egingo dugu. Hau da, labeko erretilu bat urez beteko dugu, eta ura berotzen jarriko dugu labearekin batera. Bestalde, budina egiteko beste molde bat erabiliko dugu. Uretan sartuko dugu honako moldea. Molde horren paretak, gure budina itsatsita ez gelditzeko, gurinez bustiko ditugu, eta gurina horri irina gehituko diogu. Jarraian, labera sartuko dugu. Labean 45 bat minutuz izango dugu, nahiko su baxuan (180 gradu). Ikusiko bagenu goiko partea belzten ari zaigula, eta barrukoa ez dagoela eginda, zilar paper zati batekin estaliko genuke. Prest dagoen ikusteko, zotz batekin ziztatu eta garbia ateraz gero, gure errezeta eginda egongo litzateke. Hozten utzi daiteke edo epela ere jan daiteke. Behin hoztuta dagoela, moldetik aterako dugu, bestela apurtu egingo zaigu.

Zerbitzatzeko garaian, zati bakoitzari saltsa botako diogu gainetik; saltsa berotuta. Gure platerak hotz eta bero nahasketa lortuko du honela.