Beste behin, bai; jada seigarren urtez. 2010ean egin zen lehen aldiz, orduan ere urtarrilaren 23an. Txolarre irratiaren hamargarren urteurrena ospatzeko ekitaldiak biribiltzeko saioa izan zen hura, Zizurkilen, Alegian zein Tolosan egin ziren beste saio batzuen ondotik. Ahalegina egin zen saio hura antolatzen eta oihartzuna zabaltzen. Antolatzaile gisara orduan, esperientzia ederra izan zen, emaitza emankorraz gainera bidea ere aberatsa izan zelako; han eta hemen kartelak pegatzeko estrategia onenetan trebatzeaz aparte, neu ere bertsozaletu nindutelako Leidorreko zein aurreko saioek.
Ikusle eta atarikide moduan gozatzen dut orain saioa, lehenengo urte haietan bidelagun izan ziren lagun handiekin. Eserlekuan jarri eta duela zenbait urte Txolarre irratian sinesten genuenok ereindakoak oraindik ere Ataria-rekin eta bertsozaleei esker jarraipena duela ikusteak zirrara eragiten du. Eta hala jarrai dezala: eskualdean dugun proiektuan sinesten dugunaren keinu eta baita bertsozaletzeko bide ere.