Euskaldun berria da Xabi Tello, hasieran kosta zitzaiola aitortzen badu ere, tabernako lanak asko laguntzen duela dio: «Bezeroekin asko praktikatzen dut». Taberna-jatetxeko arduraz gain, sukaldaritza irakaslea ere bada, Usurbilen. «Gazteak oso mugituak dira, baina lan polita da», dio Tellok.
Garaian garaiko sukaldea eta Kilometro 0 filosofiako produktuak gustatzen zaizkio Atxulondoko sukaldariari. Honela, txekor masailak ardo beltzarekin eta onddoekin errezeta prestatu du, pausoz pauso.
Lehenik eta behin, txekor masailak garbitu beharko dira, ura eta ozpinetan utziko dira 30 bat minutuz. Jarraian, urarekin garbituko ditugu. Eta jada beste osagaiekin hasiko gara: gatza eta piperra botako diegu, eta erreserbatuko ditugu.
Ondoren, saltsa prestatzen hasiko gara. Tipula, azenarioa, baratxuria eta porrua prestatuko ditugu. Barazkiak moztuko ditugu —tipula juliana erara, baratxuria txiki-txiki eginda, eta azenarioa eta porrua laukitxoetan—. Ondoren, barazki guztiak kazola batean, oliotan, jarriko ditugu sutan eta su-erregosten jarriko ditugu, suabe-suabe, kolorea hartu arte.
Jarraian, barazkietara masailak gehituko ditugu. Bi aldetik gorrituko ditugu. Ondoren, brandya gehituko diogu. Eta fanbleatzeko ordua iritsiko da orduan, su ematea. Behin fanbleatuta, ardo beltza gehituko diogu. Garrantzitsua izaten da erreduzitzea, hau da, alkohola kentzea, egosiz. Behin irakin duela ikusten dugunean ura, sagarra eta tomatea —laukitxoetan moztuta— gehituko dizkiogu. Osagai guztiak 2 orduz egosten utziko ditugu. Behin denbora pasata, labana baten laguntzarekin baieztatu dezakegu haragia ondo eginda dagoela.
Behin egosi dugunean, masailak aterako ditugu, hozten utziko ditugu, ondo moztu ahal izateko —sei bat xaflatan—.
Bestalde, irabiagailuaren laguntzarekin, prestatuko dugu saltsa gainontzeko osagai guztiekin. Ondoren, masailak eta saltsa elkartuko ditugu kazola batean, onddoak gehituko dizkiogu —aurretik potxatuta— eta azkenik, beste 15 bat minutu irakiten utziko dugu. Gatz puntua probatu beharko dugu.
Platerera eramateko orduan, masailak saltsa eta onddoekin zerbitzatuko ditugu, eta ondoan, patata purea gehituko diogu. Ahuntz gazta entsalada batekin lagunduz gero, mundiala!
OSAGAIAK
- Txekor masailak, 1 kg.
- 4 tipula.
- 4 ale baratxuri.
- 1 azenario.
- 1 porru.
- 1 sagarra.
- 1 tomate, heldua.
- Brandy edo cognac, 80 ml.
- Ardo beltza, 300 ml.
- Ura.
- Piper beltza.
- Onddoak, 300 gr.
- Patata purea.
