Manifestazio jendetsua izan zen, eta argi utzi genuen ez geniola inolako mesederik eskatzen Jaurlaritzari, baizik eta kalitatezko zerbitzu publiko bat jasotzeko eskubidea exijitzen geniola, gainerako eskualdeek jasotzen dutenaren antzeko zerbitzua jasotzea, hain zuzen. Zorionak arrazoi honengatik mobilizatu diren Tolosaldeko herritar guztiei; izan ere, esan ohi dugun bezala, mobilizaziorik gabe ez dago konponbiderik. Gure aldetik borrokan jarraituko dugu, eta, orain, Tolosalderako agindutako ospitale berriaren bilakaeraren errepasoa egingo dugu.
Lau urte itxaron behar izan dugu berritasunen bat izateko. Aurreko hauteskunde-kanpainan, EAJk onartu zuen, halako batean, urte askoan ukatu zuena, hau da, 65.000 biztanle baino gehiago dituen EAEko eskualde bakarra garela eskualdeko ospitale publikorik ez duena, eta Tolosan ospitale bat eraikitzen lagunduko zutela iragarri zuten. Baina lau urte horietan non kokatuko den besterik ez dute erabaki. Nola aukeratu daiteke ospitalea non egin hura nolakoa izango den ez badakigu? Eta txikia bada Tolosaldeko benetako beharretarako? Horregatik, funtsezkoa zen jakitea zein izango zen ospitale berriaren Plan Funtzionala, hau da, etorkizuneko ospitalearen ezaugarriak deskribatzen dituen dokumentua, herritarren premiak benetan betetzen dituen ala ez jakiteko. Baina ez da modurik egon hura jendaurrean aurkez dezaten, modu batera zein bestera eskatu arren, baita Eusko Legebiltzarrean ere.
Eta orain, duela 4 urte egin zuten bezala, hauteskunde hauek baino bi aste lehenago eta manifestazio jendetsua egin ondoren, Plan Funtzionala aurkeztu digute, eta nahiz eta oraindik denborarik ez dugun izan eskualdeko beste ospitale publiko batzuekin konparatzeko, ezta eskaintzen dituen zerbitzu guztiek eskualdeko biztanleriaren osasun beharrei irtenbide egoki bat eman diezaieketen edo ez ikusteko ere, ikusi dugu, eta horren beldur ginen, ez dela eskualdeko ospitale bat, zentro txiki bat baizik, esperimentu berri bat. Konparazioa eginda daukagunean, gure behin betiko iritzia jakinaraziko dizuegu.
Gainera, oraindik ere zintzilik daude beste gai garrantzitsu batzuk, hauteskundeen aurretik argitu nahi genituenak:
- Ospitale berria egin bitartean 2. mailako arreta hau jasotzen jarraitu behar al dugu?
- Zer gertatuko da Asuncion klinikarekin eta hango langileekin?
- Zergatik ez da aipatu ere egiten Asuncion klinika Plan Funtzionalean?
- Tolosaldera antzeko beste eskualde batera baino 12 milioi euro gutxiago iristen dira. Hori onartzen jarraitu behar al dute?
Bien bitartean, azken 12 urte hauetan bezala, gure aldarrikapenarekin jarraituko dugu: gainerako eskualdeek bezalako osasun arreta jasotzea gure eskualde honetan ere.