Gure Esku Dagoren herri galdeketetarako protokoloak eskatzen dituen sinadura kopurua gaindituta, galdera adosteko fasean sartu da Tolosaldeko Giltzarria. Eskualde osoko ehun lagunetik gora bilduko dira bihar Tolosako Beotibar Frontoian. Martxoaren 19ko galdera adosteko lehen saioa izango da.
10:00etan hasi eta 13:00etara bitarte, prozesu parte hartzaile baten bidez, herritarren hausnarketak jasoko dira. Zelai Nikolasek, GEDko bozeramaileak, eta Iñigo Urrutia EHUko irakasleak galderaren edukien inguruko azalpenak emango dituzte saioan zehar. Datozen asteetan saio horretako edukiak oinarri hartuta, galdeketa eguneko galdera —eskualde osoan berbera izango da— erabakiko du Batzorde Sustatzaileak.