Asteburu luzea baina oso emankorra izan da alebinek Irunen ospatu dutena. Guztira 13 izan dira gutxienekoa lortu eta txapelketa honetan parte hartzeko aukera izan duten gazteak eta ezin hobeto aritu direla esan beharra dago.
2005eko neskentzat esperientzia berria izan da eta Sara Aguirrek, Irati Urdanpilletak eta Naroa Legarrak maila honetako txapelketa batean aritzeko erronka ederki gainditu dutela esan beharra dago. Zailtasun eta maila handiko frogak burutu dituzte eta denboraldia ederki borobiltzen ari dira. Horrez gain, Irati eta Naroa brontzezko domina banarekin eta Sara Euskadiko gutxienekoa poltsikoratuta itzuli dira.
2004ko mutilek ere oso ongi egin dute igeri eta emaitza oso politak lortu dituzte, tartean erreleboetako bi brontzezko domina eta zilarrezko bat. Bakarkako dominak ere eskuratu dituzte. Guztira, mutilek, 5 urre, 3 zilar eta 4 brontze eskuratu dituzte eta Euskal Herriko txapelketan parte hartzeko gutxienekoak ere egin dituzte. Txapelketa honetan, 2003an jaiotako mutilen aurka lehiatu dira eta gureak gazteagoak izanda ere sailkapen orokorrean hirugarren postuan kokatu dira. Lan ederra egin dute Gorka Duranek, Iker Otamendik, Igor Arrigainek, Elur Urkolak eta Aimar Gonzalezek, gutxi izanagatik ere talde handia osatuaz.
2004an jaiotako neskek berriz, maila honetako lehiaketetan duten esperientzia baliatu dute eta beste behin ere, izugarri ondo egin dute igeri. Bakarkako hainbat domina lortu dituzte, 3 urre, 2 zilar eta 2 brontze, beraz, hainbatetan igo dira podiumera. Erreleboetan berriz, bi hirugarren postu lortu dituzte eta deskalifikazio oso zorrotz baten ondorioz 4x100 librean saririk gabe geratu dira. Bakarka, Iraia Otegik eta Maddi Matillak Espainiako txapelketetako gutxienekoa lortu dute 100 bular eta 200 estilo frogetan, denbora bikainekin. Lan ederra Iraia Otegik, Leire Maritxalarrek, Joane Arzalluzek, Irati Sotok eta Maddi Matillak egin dutena.
Neska mutilen sailkapen orokorrean Tolosaldea IKT-ko alebin taldea Gipuzkoako hirugarren sailkatu da. Talde oso gazte eta ez handiegi batentzat izugarrizko emaitza izan da, beraz zorionak guzti guztiei!
Bestalde, aipatu, bihar, arratsaldeko 17:00etan hasita Tolosako Igeriketako San Juan Saria ospatuko dela Tolosako Usabal kiroldegian. Bertan, alebin, infantil, junior eta maila absolutuko Gipuzkoa osotik etorritako gazteek parte hartuko dute, eta nahi duen oro gonbidatua dago jaialdi bikain honetaz gozatzera.