Pasa berri diren bi asteburuetan igeriketa eskolako gaztetxoak 50 metrotako Gipuzkoako lehiaketa jokatu dute.
Lehenengo asteburuan, Otsailak 4, eskualdeko 100 gaztetxo inguruk Lasarteko igerilekuan izandako kanporaketetan parte hartu zuten. Bakoitzak estilo bat aukeratu eta 50 metroko froga egin behar zuen. Honetaz gain, prebenjaminek eta benjamin- alebinek osatutako erreleboak ere jokatu ziren.
Parte hartu zuten guztiek estilo bikainean igeri egin zuten, estreinakoz aritu zirenak bikain egin zuten eta beteranoak berriz konfiantza handiz igeri egin zuten. Giro polita izan zen eta arratsalde ederra pasata etxeratu ginen denok.
Guztira 33 igerilari eta kategoria bakoitzeko errelebo bana sailkatu ziren Legazpiko Bikuña igerilekuan igande honetan, Otsailak 12, jokatu ziren finaletarako. Gipuzkoako lehen hamabietan sailkatu eta finalean egotea arrakasta bada ere izan ziren bakarkako saria jaso zutenak ere.
Bakoitza bere estiloan, hauek izan ziren bakarkako sariak; Joanes Ruiz, Markel Garmendia eta Unai Zubeldiak urrezko domina eskuratu zuten, Igor Arrigain eta Ibai Legarrak zilarrezko bana eta Iraia Otegi eta Maddi Matillak berriz brontzea eskuratu zuten. Honetaz gain benjamin-alebin kategorian eskualdeko taldeak hirugarren postua ere eskuratu zuen.
Villabona eta Tolosako igeriketa eskoletan egindako lana ari da pixkanaka bere fruituak ematen eta bi asteburu hauetako emaitzak ederki erakusten dute hori. Sailkapen orokorrean mutilen taldeak bigarren postua eskuratu zuen eta neska-mutilenak ere bigarren egin zuen.
Txikiek izandako zitaz gain taldeko bi gazte Euskadiko selekzioarekin autonomien arteko Espainiako txapelketan lehiatu dira. Kepa Oiartzun eta Maria Martin izan dira zita honetan parte hartu dutenak eta bakoitza bere denbora honenen inguruan ibili da. Biak asteburuan egindako lanarekin gustura etxeratu dira eta dagoeneko buru-belarri ari dira zita berriak prestatzen.
Azkenik aipatu taldeko gazte eta nagusiek asteburu honetan Azpeitian ospatuko den Gipuzkoako txapelketan eta Inauterietan izango diren Euskal Herriko txapelketetan jarriak dituztela begiak, neguko zita garrantzitsuenak aste hauetan jokatuko baitira.