250 igerilari gazteen ilusio eta pozak giro ederra sortu zuen Usabalen. Beroa izan zen nagusi harmailetan eta beroa izan zen uretan ere. Bildutako jendetzak pazientziaz itxaron zuen etxeko txikien erakustaldia gozatzeko eta saioa luzatu egin bazen ere iluntzean txikien irribarreak guztion gozamena eragin zuen.
Zarautz, Azpeiti, Donosti eta eskualdeko txikiek urduritasunak alde batera utzi eta maila dotorean igeri egin zuten. Lehen aldietako negar zotinak, biraketetako arauak errespetatzeko nahia, estilo kuttunean igeri egiteko gogoa, alebinen esperientzia denak nahastu ziren larunbatean.
Benjamin txikiek 50 metroko erronkari ederki erantzun zieten, igel eta amuarrainak pixkanaka estilo berriekin ere ausartzen direla erakutsiz. Izurdeak berriz estiloak txukun egiteaz gain koska bat gorago daudela nabarmendu zen eta lasterketen abiadura eta estrategia lanak ere lantzen dituztela erakutsi zuten. Marrazoak berriz, maisutasun handiz estilo eta distantziak ederki menperatzen dituztela argi utzi zuten, eskolako azken maila izanik txikienentzat ispilu ezin hobea direla argi utziz.
Paco Sanchezen familiak gogoz banatu zituen dominak eta beste urte batez hunkituta jaso zuten ikusleen txalo zaparrada eta aita eta aiton zutenari egindako omenaldia. Tolosaldea IKT-k berriz errelebo nagusia irabazi zuen eta txiki guztiak pozarren jaso zuten Paco Sanchez garaikurra, beste urte batez etxean ongi gordeta geratuko dena.
Tolosa eta Villabonako Udalak, Kirolzer, Eceiza gozogintza, M.P kirol materiala eta Eroskiren laguntza ere ezinbestekoak izan ziren saioa antolatzeko eta arratsalde osoan zehar egindako zozketetan nahiz amaieran sariak banatzeko.
Bestalde eskualdeko igerilarien gurasoek ematen duten laguntza eta lanerako grina ere eskertu nahi genituzke lerro hauetatik.
Mila esker guztioi eta Zorionak!