Badator urtero Tolosaldea igeriketa elkarteak goxotasunez antolatzen duen txapelketa berezia. Eskualdeko igeriketaren alde egindako lana eskertuz Paco Sanchez jaunaren omenez ospatzen den saria hain zuzen ere.
Tolosaldeako 120 bat igerilari benjamin eta alebinez gain, Donostiako Fortuna, Azpeitiko Izarraitz eta Zarauzko igeriketa elkartetik ere gaztetxo mordoa hartuko dugu etxean. Guztion artean arratsalde bikaina pasata etxeratzeko helburuarekin harrera bikaina prestatzen ari gara 250 igerilari gazte hauei.
Urtero bezala, 4 estiloetako frogak ikusteko aukera izango da Usabalen eta baita emozioz beteriko azken errelebo handia ere, azken urteetan Paco Sanchez saria eskualdeko taldeak irabazi badu ere arratsaldeko azken frogan ez da lehia makala izango. Benjamin txikienek 50 metroko distantzian lehiatuko dira eta benjamin nagusi zein alebinak berriz 100 eta 200 metroko frogetan.
Arratsalde pasa polita izango da eta lerro hauetatik guztioi gonbidapena luzatzen dizuegu!