Asteburu honetan eskolarteko Gipuzkoako txapelketa jokatu da Legazpin eta Tolosaldea I.K.T-ko amuarrain, izurde eta marrazoak bikain lehiatu dira. Ikasturte osoan zehar izugarri hobetu dutela erakutsi dute eta horretaz gain hainbat sari eta Euskadiko txapelketarako txartela ere lortu dute batzuk.
Larunbatean igerilari osoa txapelketa jokatu zen, bertan 2003 eta 2004.urteetan jaiotako mutilak eta 2003.urtean jaiotako neskak parte hartu zuten, guztira 22 neska mutil.
Igerilari bakoitzak 4 froga igeri egin zituen, bana estilo bakoitzeko. 50 tximeleta, 100 bizkar, 100 bular eta 100 libre hain zuzen ere. Guztiek bere lana oso txukun bete zuten eta emaitzak ere bikainak izan ziren. Ia guztiek euren denborak hobetzea lortu zuten dotoretasun handiz igeri egin ondoren. Bi brontzezko domina eta bosgarren postu bat izan ziren sailkapen orokorreko postu nabarmenenak.
Igandean, 2002 eta 2001.urteetan jaiotako mutilak eta 2003an jaiotako neskak parte hartu zuten eskolartekoan. Guztira 17 izan ziren eskualdeko ikastetxeen ordezkaritza osatu zutenak. Hauetako bakoitzak bi froga igeri egin zituen, bat goizean eta bestea arratsaldean, biak bakoitzaren gaitasun eta gustuen arabera aukeratutakoak. Guztiek, bezperan bezala oso dotore eta txukun egin zuten euren lana eta emaitzak ere bikainak izan ziren. Bakarkako frogetan 5 urre, 6 zilar eta 5 brontze eskuratu zituen taldeak eta erreleboetan berriz 2 zilar. Gainera igerilari hauetako 11 asteburu honetan Donostian jokatuko diren Euskadiko eskolarteko jokoetarako sailkatuak izan dira.
Asteburu borobila beraz taldeko gaztetxoek pasa dutena. Lerro hauetatik zorionak guztiei emaitza bikainagatik eta baita portaera eredugarriagatik ere!