Urtez urte arraunaren grina hauspotzen ari da Tolosaldean. Zenbakiek ez diote kontrakorik. 100 lagunetik gora arituko baikara arraunaren uberan aurten ere. Iazko kopuruei eutsi diegu. Guztira 100 arraulari arituko dira TAKen tostan, 50 emakume eta 50 gizon. Horiei toletapeko aginduak ematen, laguntzen eta gidatzen, 25 lagun arituko dira.
Urteak daramatzagu Zerkausi azpian, itzalpean, lanean. Baina urte hauetako lana ari da argia ikusten. TAKeko harrobiko arraunlariak Kantauri itsasoan ari baitira lehiatzen, San Miguel eta EuskoTren ligetan. Arraunlari horiek Tolosako habia aspaldi utzi zuten arren, ez dute altzoa erabat baztertzen, bateletako haurrak entrenatzera gero eta gehiago animatzen baitira.
Bateletan ondorengo taldeak izango ditugu 2017 denboraldian
Infantilak
Emakumezkoetan 2 talde
Gizonezkoetan 2 talde
Kadeteak
Emakumezkoetan 3 talde
Gizonezkoetan 3 talde
Jubenilak
Emakumezkoetan talde 1
Gizonezkoetan talde bat
Seniorrak
Emakumezkoetan talde bat
Talde mixto bat
Liga Orion hasiko da
Orion hasiko da Gipuzkoako Liga, hilaren 14an. Zarauzko Arraun Elkarteak bizilagunen herrian du egoitza; beraz, estropada Orion egingo den arren, zarauztarrek antolatuko dute. Urtarrilaren 14an, larunbatean, izango da denboraldiko lehen zita hori.