Zizurkilgo PSE-EE berriro ere kezkatuta agertu da herrian etxebizitzarik ez dagoelako, eta EH Bilduren gobernuari eskatu dio erabilerarik gabeko lokalak etxebizitza bihurtzea bultza dezala, betiere bizigarritasun baldintzak betetzen badituzte.
«Ezin dugu Zizurkil eremu tentsionatu izendatu arte itxaron Udalak jardun dezan. Zizurkilen bizi dugun etxebizitza eskasiari irtenbidea emateko neurriak hartu eta lanean hasteko unea da», adierazi du Josean Sanchez bozeramaile sozialistak.
Sozialistek osoko bilkuran proposatutako neurriari esker, etxebizitzen gabezia arinduko litzateke, auzokide askori lasaitua emango litzaieke eta gazteek udalerritik alde egitea saihestuko litzateke.
Era berean, udal talde sozialistak Bulandegi kaleko 23. zenbakian udalak dituen lokalei buruzko informazioa eskatu du, etxebizitza gisa gaitzeko aukera baloratzeko. 2022an, PSE-EEk proposatu zuen lokal horiek etxebizitza gisa gaitzea larrialdien aurrean, hala nola Ukrainako gerra edo hondamendi naturalak direnetan. «Orduan, EH Bilduren gobernuak ezustean harrapatu gintuen eta hainbat kolektibori utzi zizkien lokal horiek euren jarduerak aurrera eraman zitzan, erabilera gabe utziz Aurreran zeuden udal bulego zaharrak; zaurgarritasun egoeren gera daitezkeen gure bizilagunen beharrak ez ditu lehenesten udal gobernuak » adierazi du Sanchezek
Etxebizitzek lehentasuna izaten jarraitzen dute alderdi sozialistarentzat. Horregatik, beste behin ere, «besoak gurutzatuta ez geratzeko eta herritarren kezka nagusietako bati irtenbidea emateko bere esku dauden baliabide guztiak jartzeko eskatzen diogu gobernu honi», amaitu du bozeramaile sozialistak.