Urtean zehar hainbat proiektu martxan izaten dituzte Orixe BHI ikastetxean, ikasleen arteko harremanak zabaldu, sareak sortu eta irakasleen formazioa atzerrian gauzatzeko helburuarekin. Horien artean, Europako Erasmus Plus egitasmoaren barruan, aurten ere elkartruke bat gauzatu dute. Batxilergoko lehen mailako 22 ikasle Menen herrian izan ziren, eta orain, belgikarrek hartu dute lekukoa.
Joan den igandean iritsi ziren 22 ikasle belgikar Tolosara, eta igandera arte izango dira gurean. Jasangarritasun gaia kontuan hartuta, inguruko txokoak ezagutuko dituzte. Esaterako, atzo, Tolosako udaletxean egin zieten harrera eta ondoren, herria ezagutu zuten. Gaur Donostiara joango dira, bihar Ordiziara eta ondoren, Aranburu gaztandegia bisitatuko dute. Ostegunean Urdaibai ekoetxera joango dira, eta ostiralean Orixe ikastetxean geratuko dira proiektu bat egiten.
Ikasleak «biziki eskertuta» daude Orixe BHIko gela egonkorreko ikasle eta irakasleek dantzatutako ongietorriarekin. Ostiralean, hamaiketakoa izango dute, ZIG gelako ikasle eta irakasleen eskutik.
European Youth Parliament
Bestetik, asteburuan, Batxilergoko bigarren mailako ikasleak Donostian ospatuko den European Youth Parliament ekitaldian parte hartuko dute. Europa mailan egiten den egitasmoa dela jakinarazi du Arantxa Mendizabal Orixe Insitutuko Eramus batzordeko kideak: «Belaunaldi bateko gazteak hautatzen dituzte haien artean Europa mailako arazoen inguruko hausnarketa bultzatzeko. Imigrazioa izan daiteke arazo horietako bat, hizkuntza minorizatuak, geopolitika, dibertsitatea edota sare sozialak. Gazteek askotan politikaz alde egiten dute eta erabaki horietan parte hartu dezaten antolatzen da».
Europako hainbat herrialdetako –Austria, Ingalaterra, Portugal, Suedia eta Albania– ikasle ugari elkartuko dira, baina Espainiako beste hainbat autonomia erkidegoko gazte ere izango dira bertan. Igandean egingo dute parlamentua Donostiako udaletxean, 09:00etatik 19:00etara.