ataria.eus

Etxerako lanak

Erabiltzailearen aurpegia Iritzia   Pasahitza

Ostiral honetan (2018-07-06) goizean goiz altxorraren kokalekua azaltzen duen pista bat utziko dut Tolosako txokoren batean gordeta. Bai bai, benetan. Pista horren gordelekua honakoa da:  5:3 / 17:1 / 9:27 / 9:35 / 27:4

Ikusiko zenuten dagoeneko, ezta? Manolo izeneko irakasle andaluziarrak bere ikasleei bidalitako oporraldirako etxerako lan berezien kontu hori. Nik hasieran ez nion kasu gehiegirik egin. Udan zenbat huskeria sentsazionalista sartzen dizkiguten albistegietan xorro-xorro, ene. Baina gaur korreoz eta whatsappez ere bidali didate zerrenda demonio hori. Eta irakurri egin dut.

Bada, kontu honek fenotipo hutsala badu ere, genotipo sakona duela uste dut. Hona ditxosozko lista, irakurri ez duenarentzat:

Eguna argitzen ikusi, mahai edo karta-joko berri bat jokatzen ikasi, 3 gelakideei mezu bat idatzi ala deitu, film bat familiartean ikusi, etxeko limoi-edaria prestatu eta edan, 40 minutuz izarrei begira egon, etxeko izozkiak atondu, landare bat zaindu, bildu berri duzun fruitu bat jan, gau batez oso berandu oheratu, igerilekura salto egin eta sekulako zipriztinak bota, hondartzan zein zelairen batean piknik bat antolatu, norberarentzat lepoko edo pultsera bat egin, su artifizialei so egin, museo edo erakusketa bat ikustatu, urez betetako puxikekin jolastu, ezagutzen ez duzun herri edo hiriren bat bisitatu, lainoei begira egon, lagun eta senideekin gozatu, dantzan zein jolasean aritu, kirola egin, zaindu zure burua, maitatu zeure burua, mozorrotu, oinutsik ibili, hondarrezko gaztelu bat eraiki, bizikletaz ala patinatzen bueltaxka bat eman, posta-txartel bat idatzi eta bialdu, hondartzan maskorren bat jaso, ez bota zaborrik lurrera, bi liburu eta komiki pare bat irakurri, errezeta berri bat ikasi, txirrista batean jostatu, zerbait berria egiten ikasi, fruta broxeta bat jan, barrez lehertu, egunero gutxienez hiru besarkada eman, harriak jaso eta margotu, liburutegira joan, norbaiti begietara begira maite duzula aitortu, kometa batekin jolasean aritu, etxeko bi ardura gutxienez hartu eta azkenik, bi lagun berri egin.

Uffa… Ikasgai teorikorik gabeko, baina irakaspen praktiko potoloz beteriko zerrenda Manolorena. Bere irakasle rola gainditu eta indar eragile bilakatu da. Edo bere irakasle rola era borobilean bete du, hobeto esanda. Zeregin txiki, ñimiñoez osaturiko lista hau edozeinek osa lezake bai. Zentzu horretan, ez du ezer berririk asmnatu zeru-azpi hontan Manolok. Baina beste askok lortuko ez dutena erdietsi du bere ikasle taldearekin: hauek erasoa jotzea. Kalera irtetea. Euren hitzak eta asmoak ekintzez eta probetxuz osatzea. Gauza garrantzitsuen adierazgailua kalibratzen lagunduko die haurrei, eta baita euren gurasoei ere. Zeharka. Eta niri ere, askori, espero ez zuen beste zeharkako bide batetik. Betebeharrez haratago, bete beharko genituzkeen nahi txikiak konplitzea gure eguneroko eskolako lanak beharko lukete izan. Bizipozaren mantenurako lanak. Gauza txikien handitasunaren demostrazio enpirikoa, Manoloren arauaren frogapena.

Nik aurrerapausoa emateko ezinbesteko bultzada jaso dut dagoeneko, eta nire lista propioa idatzi dut. Bai bai, benetan. Eta artikulu honen atzean puntuetako bat ezkutatzen da: altxorraren bilaketa jolas bat antolatzea. Zeinentzat? Ba zuentzat. Ostiral honetan (2018-7-6) goizean goiz altxorraren kokalekua azaltzen duen pista bat utziko dut Tolosako txokoren batean gordeta. Bai bai, benetan. Pista horren gordelekua honakoa da:

 

5:3

17:1

9:27

9:35

27:4

 

Muxu haundi bat eta zorte on.

Erantzunak

Erantzuna | #1

Altxorraren bilaketa honekin zerikusirik izan ez zuen hutsaldi bati esker izan nuen artikuku honen berri. Kasualitatea edo, batek daki. Gaur, hutsaldiak hutsaldi, zorte galanta izan nuela pentsatzen dut oraindik.

Ostegun gauean lortu genuen lehengo pistak nora eramango gintuen asmatzea: Korreo kalea 40 landare atzean. ARKUPE! 'Bihar eguerdian laneko pertsiana jaitsi eta salto batean joango naiz'.

Eta hala egin nuen. Bertan zegoen, landarearen hostoen kolore berdineko karta, eta barruan, zentzua aurkitzen saiatu beharko genuen beste zenbaki sorta bat. ‘Ze ondo! Hau ez da hemen bukatu!’ Korrika egin nuen kotxera bueltako bidea. Kotxea gaizki aparkatuta nuelako, edo une horretan joku honek sortu zidan zirrara bideratzeko beste modurik aurkitu ez nuelako, agian.

Gauean Cheyennen afaldu genuen Joseba eta biok. Mahai gainean hanburgesak, bi garagardo, zirriborroko papera eta boligrafo bat. Lehenengo pista deszifratuta, bigarrena ere erraz asmatuko genuela uste nuen. Baina usteak, oraingoan ere erdiak ustel. Horrelakoetan ez dago lagun on baten laguntza baino hoberik. Mila esker.

Rondilla 34… EZEIZA. Tripa ondo beteta nuen arren, hurrengo goizeko gosarirako gogoa piztu zitzaidala aitortu behar dut.

8:00-etarako han ginen. Kafesnea, bonba (kremazkoa, noski) eta “Altxorraren bila 2” zihoen beste sobre bat jaso genituen. Ba ote dago larunbat goiza hasteko modu hoberik? Traba bakarra nuen. Laneko persianak 9:00-etarako ireki behar nituen, eta ARREGI FLORISTAS-ekoak 9:30-ak arte ez ziren igoko.

Kopilotoaren eserlekuan jarrita lanera bidean gosaldu nuen. ‘Eta orain zer?’

Mikel! Zertarako gaude anai-arrebak helduagotan ere jolas-lagun izateko ez bada? Tolosako azokatik larunbateroko erosketak egin ostean, Arregitarrenera gerturatu eta altxorraren bilari buruz galdetuz gero sorpresaren bat izango zuela esan nion. ‘Olatz, benetan?’ erantzun zidan, baina ez nintzen apuratu. Ondo ezagutzen baitnau eta bazekien baietz, benetan ari nintzela.

Hamaikak aldera jaso nuen whatsapp-eko audioa. Listo! Hiru egun iraun zituen abentura hartako azkeneko geltokia hura zela jakinarazi zidan, altxorra salbu zela... Eta kitto. Sekulako jakinmina nuela bazekien arren, eguerdirarte mantendu nahi izan zidan misterioa.

Bere urtebetetzea ospatzeko aitzakiarekin bazkaltzeko plana geneukan egina, eta paradojiko xamarra dirudien arren, opariak ireki zituen pertsona bakarra ni neu izan nintzen. Kaktus bat eta Bakarrizketan liburua. Manolo! Landare bat zaindu, bi liburu eta komiki pare bat irakurri…

Jo, ze opari politta Olatz! Koxkorragoa nintzeneko garaiak ekarri dizkidazu gogora. Lanean hasi naizela jakin ezazu, baita Manoloren lista oheaurreko mahaian izango duda udara zein udazkenean.

11:2;2 10:3;2 2:6;6 3:1;1 4:13;3 4:13;9 5:3;4 2:16;3 1:1;1 10:23;6 11:6;1 7:6;2

11:5;1 11:5;2 11:5;3 11:5;4 11:5;5

Erantzuna | #2

11:2;2 10:3;2 2:6;6 3:1;1 4:13;3 4:13;9 5:3;4 2:16;3 1:1;1 10:23;6 11:6;1 7:6;2

11:5;5 11:10;9 4;13;3 5:3;4,

11:5;1 11:5;2 11:5;3 11:5;4 11:5;5!!!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa