Mikel Diestroren mutilek defentsa atzeratuarekin ekin zioten neurketari, Valentziako taldearen bosteko joko etengabea —atezainaren etengabeko gehikuntzarekin— ondo neurtuz. Bigarren minutua apenas igaro zenean, area ertzeko falta batek partidaren norabidea aldatu zuen: Rafa Usinek jaurtiketa hormaren artetik doituta sartu eta 1-0ekoa sinatu zuen, Belabieta zutik jarri zuen kolpe garbia.
Picassentek berehala erantzun zuen aukera argiekin, eta 6. minutuan Alonso Ocañak berdinketa jarri zuen. Bisitarien pozak denbora gutxi iraun zuen, hala ere. Minutu bat geroago, Rafak bandatik sua piztu baitzuen berriro: baloi neurtua zerbitzatu, eta Sergiok, kontrol finarekin eta erremate kirurgikoarekin, abantaila itzuli zien ibartarrei. Marcosek taldea eutsi zuen buruz buruko bikain batekin eta maila handiko bi geldiketarekin, baina berriz ere Alonso Ocañak, 17. minutuan, markagailua berdindu zuen atsedenaldira berdinketarekin iristeko.
Bigarren zatiak beste usain bat izan zuen. CMO Valves Lauburu Ibarrak maisutasunez txandakatu zuen hirunakako jokoa —Gorka edo Unax pibot— eta launakakoa, maila oso altua emanez. 22. minutuan, Morandok etxekoen nagusitasuna borobildu zuen 3-2arekin. Kontrola morea zen eta, trantsizio ziztu bizi batean, Enaitzek gol eder bat egin eta 4-2koa ezarri zuen. Neurketa bideratuta zegoela zirudien.
Picassentek, baina, ez zuen amore eman. Bosteko jokoan, Alejandrok aldea murriztu zuen 36. minutuan eta urduritasuna erein zuen harmailetan. Suspensea 39. minutura arte luzatu zen; orduan, Rafak ia 30 metrotik egindako jaurtiketa batekin markagailua itxi eta edozein itzulera-saiakera itzali zuen. Bigarren zati bikaina etxekoentzat eta pisu handiko garaipena Belabietan.
Lauburu KE Ibarra Mahalak berriz ere huts egin du
Ez zuen zorte bera izan Lauburu KE Ibarra Mahalak, Jarrilleros FSren aurka 2-3 galdu baitzuen. Txubelen eta Garmenen mutilek neurketaren zati handi batean agindu bazuten ere –moreek hasierako minutuetan aurrea hartu zuten– xehetasun txikiek garesti atera zitzaizkien.
Taldeak gehiago merezi izan zuen: jokoa eta aukerak sortu zituen, baina oraingoan zorteak bizkarra eman zion. Emaitza gorabehera, sentsazio onak utzi zituen, errendimenduak baikortasunerako bidea irekitzen baitu, eta datozen jardunaldietan puntuak iritsiko direla pentsarazten du.