Kanporaketa bideratuta egon daitekeela dirudien arren, igande honetan hasitako anbizio eta lan berdinarekin ekin behar zaio itzulerako partidari, nahigabe bat izan nahi ez badugu. Bizkaitarrek erreakzionatzeko gaitasuna dute eta zalantzarik gabe partida plan bat prestatuko dute kanporaketari helduta jarraitzeko.
Diestrok zuzentzen duen taldeak, nahiz eta 1-0ekoa bere atean sartu, ez zuen etsi eta lanean jarraitu zuen jokoaren kontrola hartu arte, eta estrategia ekintzekin konbinatutako erasoetan abantaila zabaltzen joan ziren markagailuan. Chukyk lehenbiziko golean egindako lana nabarmendu behar da, ederra izan baitzen.
Bigarren zatia oso luzea egin zen. 1-5ekoa egin arren Otxartabek ez zuen partida galdutzat ematen eta 2-5ekoa egiteko irabazlearen harrotasunari heldu dio. Hortik aurrera kolpeak txandakatuz ibili ziren, atezain jokalariarekin jokatuz ia bigarren zati osoa.
Datorren larunbatean, 20:15ean izango da lehenengo kanporaketa honen amaiera. Partida ohiko ordutegitik irtengo da, hirugarren nazionalak ordutegi bateratuan jokatu beharko baitu, aurkaria, Albardero Rivabellosa, jaitsieran inplikatuta dago-eta.
Hirugarren nazional mailakoa
Hirugarren nazionalak 3-1 galdu zuen Tolosalaren aurka. Jokin eta Alex tandemak zuzentzen duen taldeak partida ona jokatu zuen eta jardunaldia zapore onarekin amaitu zen, izan ere, jaitsierako zuzeneko norgehiagoken emaitzek taldeak bere lehen urtean kategoria salbatzea ekarri baitute.
Kategoriako lantalde gazteena izanda, talde honek harro egoteko moduko denboraldia egin du. Joko ona eginez eta esperientziak pilatuz etorkizun oparoa izango du, eta, horri esker, beren talenturik handienetako batzuk lehenengo taldean ikusteko aukera izango da denbora gutxian.