Guretzat, ez irabazteak soilik uxatuko zuen aukera hori, beraz, Bilbora begiratu beharrean, lana betetzea eta emaitza ezagutu arte itxarotea besterik ez zitzaigun geratzen. Kostata, baina iritsi zen, taldearen eta zaleen artean zalaparta sortu zuen berria.
Garaipena 1-3koa izan zen eta Pinsequek Otxartaberen aurka berdindu izanak bigarren postuan utzi gintuen, 66 puntunako berdinketarekin. Aldeko gol kopuruari esker, txapeldunorde postuan ospatu ahal izan genuen garaipena Errioxara joandako ia berrogeita hamar lagunekin batera.
Pentsatzeko astirik gabe, hirugarren playoff-a jarraian jokatuko dugu asteburu honetan talde bizkaitarraren aurka. Talde bizkaitarrak seigarren parte hartzea du Bigarren Mailara igotzeko lehiaketa honetan. Kategorian jauzi bat ematearekin jolasean ibili diren bi euskal taldeen arteko lehen lehia izango da. Itzulikoa Belabietan jokatuko da maiatzaren 17an.