Eta horixe gertatu zen, hain zuzen. Bagenekien arrisku handia zegoela eta, partida osoan abantaila nahikoa atera ezean, azken minutuak gogorrak izango zirela. Zentzu horretan, nahiz eta Chukyk bi gol sartu (lehena 24. minutuan eta bigarrena 29. minutuan), eta nahiz eta, Jotak adierazi zuen bezala, "orokorrean erasoan eta defentsan ondo" aritu ginen, atezain jokalariarekin erabaki zen partida.
Gure entrenatzaileak esan zigun bazekitela Pasaiakoek arazoak sor zitzaketela, 5eko jokoa ondo landua dutelako. Eta hala izan zen. Hiru minuturen faltan, 2-1ekoa jarri zuten defentsako oreka falta bat aprobetxatuta, eta, bi minutu geroago, pase batean egindako akats baten ondorioz, etxekoek gola sartu zuten berriro, eta 2-2koa jarri.
Hortaz, puntu bakarrak bidaiatu zuen Ibarrara Ligako lehen partidaren ostean. Batzea beti da positiboa, baina azken unean 2 puntuk modu horretara ihes egiteak min ematen du. Horren harira, Jotak honako hau adierazi zuen: "Gauza onak ikusi ditut, baina ezin izan dugu partida nahi bezala itxi. Kirol honek amaieraraino egotea eskatzen du, eta hori da egin behar dugun irakurketa. Halaber, kontran jasotakoak ere, ia amaieran, mentalki eragin digu. Gertatu zaigun hontatik ikasi behar dugu". Lanean jarraitzeko ordua da, elkarrekin, eta jakitun izanik hau hasi besterik ez dela egin.
GOAZEN LAUBURU!!!!