Puntuei dagokienez, parekatuta gaude, baina haiek Guadalajaran 3 puntu lortzetik datoz. Gainera, Gabonetan aldaketa handia izan dute, eta Yerai joan zaie, Jonathan Camara, eskarmentu handiko beste jokalari bat, haren postuan ipiniz. Erritmoa hartzea kostatzen ari dela badirudi ere, ziur buruko postuetara lotu eta igoera postuetan sartzeko borrokatuko dutela, urtero bezalaxe. Horrela, bigarren itzulia +3 batekin hastea funtsezkoa izango da haientzat ere.
Erronka handi honi aurre egiteko, jokalari guztiak deitu ditu gure entrenatzaileak, Juaristi izan ezik, oraindik ez baita osatu. Era berean, Ilias zalantza izango da azken unera arte, birus gastriko bat dela eta. Jubeniletatik, Ikerrek eta Ekainek bidaiatuko dute, eta Marcos itzuliko da, pixkanaka erritmoa hartzeko. Azkenik, 5 hilabete eta erdiko errehabilitazio-prozesu baten ondoren, Oier Azkunaga ere deialdian sartu da. Zorterik onena opa diogu berarentzat aro berri bat den honetan.
Partida parekatua ikustea espero du Jotak, lehen itzuliko azken zatian bezala lehiatuz. "Partida amaierara arte borrokatzen duen talde lehiakor hori izatea nahi dut", zioen. Goazen ba horren bila! Goazen Lauburu!