Funtsezko puntua azken 40 segundoetan

Erabiltzailearen aurpegia

Gure taldeak puntu bat eskuratu zuen atzo, kantxa zail batean eta inoiz amore eman ez zuen aurkari baten aurka (4-4).

Atzo 16:45ean atera ginen Belabietatik Bastidara garaiz iristeko. Jotaren mutilek Mahastiak Bastidaren aurka jokatu behar zuten, Ligako bigarren jardunaldiari zegokion partidan. Denok dakigun bezala, funtsezkoa da hasieratik puntuak lortzea eta, etxetik kanpo helburu hori lortzea zaila den arren, ibartarrek konfiantzaz eta erabakitasunez bidaiatu zuten.
Horrela, Juaristi, Eñaut, Oscar, Iker eta Marcos izan ziren hasierako bostekoa. Bastidakoen defentsa onak presio irteera zailtzen zien moreei. Etxekoak ere lasaitasunez aurrera egiteko zailtasun ugari izaten ari ziren eta Ikerrek behin baino gehiagotan lapurtu zien baloia. Hala ere, pixkanaka-pixkanaka, bi taldeek lehen aukerak sortu zituzten eta, partidako 3. minutua betetzear zela, Adilen gola iritsi zen, area barrutik eta Oscarren pase baten ondoren (0-1).

Gureentzako beste aukera garbi bat Ikerrek korner baten ondoren bigarren zutoinean jasotzen zuenean iristen zen. Jokalari gazteak ez zuen baloia ukitu gutxigatik eta, egin izan balu, aldea handituko genukeen. Era berean, beste aukera garbi bat ere izan zuen Adilek, presio irteeratako batean baloia lapurtuz. Jaurtiketa egin zuen, baina atezainak ondo urrundu zuen.

Minutuek aurrera egin ahala, neurketaren erritmoa eta intentsitatea handituz joan ziren eta, lehen zatiaren amaierarako 7:46ra, gure bosgarren falta iritsi zen. Ondorioz, lasaitu egin behar izan genuen, une hartan garrantzitsuena atsedenaldira aurretik iristea baitzen. Horrela, joko estiloan aldaketa gutxi eginda, partidaren erdialdera 0 eta 1-ekoarekin iritsi ginen.

Aldageletatik bueltan Christian, Adil, Juaristi, Oscar eta Jorgerekin irten ginen. Lehen minutuan Adilek eta Christianek egindako 2x2 batekin aukera ona sortu genuen arren, berriz ere asko kostatzen ari zen presiotik irtetea. Gero, lagapena iritsi zen, Jorgek bigarren aldiz pilota jotzea erabakitzen baitzuen ateko sake baten ondoren, baloia bere ate barrura zuzenean zihoala ikusita. Arabarrek indarrez jaurti eta gure taldearen hesi sendoak baloia barrura sartzea eragozten zuen. Aldaratzean, Jorgek bikain gelditu zuen baloia. 

Aurkaria partida berdintzeko zorian egon eta gutxira, bigarren zatiko 4. minutuan hain zuzen, Christianek aldea handitu zuen eskuadratik sartutako gol ikaragarri batekin, taldeari atsedenaldi garrantzitsua emanez (0-2). Hala ere, gola sartu eta gutxira, madrildarrak bere bigarren txartel horia ikusten zuen, etxekoak falta batetik jaurtitzera zihoazenean behar baino lehenago hura ixtera gerturatu izanagatik.

Christian kanporatzeak min handia egin zigun. Bat gutxiagorekin, ondo eutsi genion, Ivan Mulasek, Bastidako entrenatzaileak, 5-eko jokoarekin irtetea erabaki zuen arte. Nagusitasun hori aprobetxatuz, amaierarako 13 minutura igo zuten beren lehen gola (1-2). Markagailura hurbiltzeak eta zaleen animo amaigabeak entzuteak, indar handia eman zien eta, segundo batzuk geroago, berdinketa lortu zuten kontraeraso batean (2-2). Berdinketarekin pozik ez eta partidan erabat sartuta, minutura, aurrea hartu zuten (3-2). Horrekin, jokoaren azken minutuak aurrera ateratzeko, gure entrenatzaileak konfiantza osoa jarri zuen jokalari jubeniletan. Erantzukizun handia zen gure oinarriarentzat eta ahalegin handiz erantzun zuten.

Aurrerago, gure arearen ertzean egindako falta arriskutsu batek arabarren estrategia jokaldia ekarri zuen. Partida erabaki ahal izan zuten bertan, baina baloia gora joan zen. Horren ondoren, Jotak atezain jokalariarekin irtetea erabaki zuen. 6 minutu besterik ez ziren falta eta dena eman behar genuen. Horrela, gure taldeak baloia ondo mugituz, partida berdintzea lortu zuten Ikerren eskutik area barrutik eta amaierarako 4:26ra (3-3). Ondoren, berriz ere gola sartzeko zorian izan zen tolosarra, baina aurkaria ez zegoen amore emateko prest eta, minutu eta erdira, berriro aurreratu zen gure ate hutsa aprobetxatuz (4-3).

4 eta 3-koarekin gure entrenatzaileak 5-eko jokoarekin jarraitzea erabaki zuen. Erabaki arriskutsua izan zen, baina aldi berean funtsezkoa atzoko norgehiagokan; izan ere, jokalari bat gehiagorekin, amaierarako 40 segundora, Juaristi gure kapitainak partida erabakita utzi zuen arratsalde/gaueko azken golarekin (4-4).

Norgehiagoka lehiatua eta zirraragarria eta merezitako puntua Ibarrara. Nabarmentzekoa beste behin Euskal Ligako gazteen lana. Atzoko garaipenaren zati handi baten egileak haiek izan ziren, zalantzarik gabe. Partidaren amaieran Jotak honakoa adierazi zuen: "Puntu bat ateratzea positiboa izan da. Pozik noa jubenilen errotazioagatik. Krisi uneari eutsi diogu eta atezain jokalariarekin fresko iritsi ahal izan gara. Partida oso parekatua eta garbia izan da”.

Kategoriako maila ikusita, amore ematea ez da inoren aurreikuspenetan sartzen. Orain, lan handiko astea daukagu aurretik, larunbateko partida gogoan izanik eta asteazkenean Otxartaberen aurka Bilbon jokatuko dugun Errege Kopako partida ahaztu gabe. Goazen Lauburu!!!!

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!