Inauterietan murgildu aurretik kategoria nazionaleko saio bikoitza Belabietan

Erabiltzailearen aurpegia Lauburu K.E. Ibarra 2018ko ots. 9a, 08:54

Lauburu Ibarra Mahalak larunbatean 16:00etan jokatuko du Belabietan ligako bere hamalaugarren jardunaldia. Moratuek, jokatutako azken 21 puntuetatik 17 gehituta, bolada onean daude eta Bilboko Otxartaberen aurrean ere puntuak pilatzen jarraitu nahi dute. Talde hau sailkapeneko beheko partean kokatua dago.

Joaneko partiduan, bizkaitarrak 3-1 irabazi zieten ibartarrei, baina Aitor Arevaloren mutilak, Tolosako inauteriak ospatzen ari badira ere, emaitza horrek utzitako zapore txarra kentzeko irabazten saiatuko dira.

Otxartabek jokatutako azken 12 puntuetatik 9 gehitu ditu, jardunaldiz jardunaldi hobetu den taldea da eta denboraldia hasi zenetik, orain ari da bere errendimendurik onena erakusten.

Entrenatzailearen esanetan: “Jokalari desberdinen lesioek markatutako aste zaila izan dugu. Taldeak badaki aurreko asteburuan ez genuela lan ona egin eta bere mailarik onena eman nahi du berriro, joanekoa irabazi zigun taldea garaitzeko. Ezagutzen dugu taldea, oso bertikala da eta pibot jokoa asko erabiltzen du. Etxeko norgehiagoka guztiak irabaztea helburu erakargarria da eta horretarako, data berezi hauetan ere, gure mailarik onena eman behar dugu”.

Gainontzeko kategorietan Txubelen mutilak, 1go Probintzialean lortutako emaitza da azpimarratzekoa. Aste honetako asteazkenera, otsailak 7, aurreratu zuten norgehiagoka eta Lauburu Aldaz Klinikak 7eta 1eko emaitzarekin irabazi zion Egarri taberna taldeari.

Larunbatean saio bikoitza izango da Belabietan, Ohorezko Mailaren ondoren Bigarren B Nazionalak jokatuko baitu bertan, Juventud del Circulo CD Burgosko taldearen kontra. Denboraldiaren azken herenean sartu garen honetan, oso norgehiagoka garrantzitsua da, datorren denboraldian kopan postu bat lortzeko helburu erakargarria baitago jokoan. Klubarentzat erronka historikoa izango litzateke, konpetizio hau sortu zenetik ez baitu bertan parte hartzea lortu oraindik.

 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!