LAUBURU K.E. IBARRA MAHALA, Jubenilen Ohorezko Maila, txapelketan hondarrean dagoen Zierbena C.D.F. jasoko du. Partida gaur, larunbata, izango da Belabieta kiroldegian 16:15etik aurrera; eta ondoren, 18:30ean lehenbiziko taldeak partida erabakigarri bat jokatuko du Iruñeko San Juan taldearen aurka. Gaurko garaipenak datorren denboraldian Bigarren B mailan jarraitzeko aukera bermatuko lioke.
Denboraldi honetan Nazional mailako bi taldeak Belabietan batera ikusiko ditugun azken aldia izango da, talde bakoitzaren helburuen lehian, ibartarrak animatzeko aukera paregabea.
LAUBURU ALDAZ KLINIKA, gizonezkoak, aurreko jardunaldian garaipena lortu zuen eta atzo Zaldibian jokatu zuen partida garrantzitsu bat, Zaldibiako Tellatuberri taldearen aurka. Bere kantxan irabaztea oso zaila den taldea.
Lehiaketa amaitzeko hiru jardunaldi besterik ez dira falta eta Txubelen mutilak hiru partida zailak dituzte aurrean. Lehenbiziko lau postuetako bat lortzeko borroka oso lehiatua da eta partida bakoitza final baten parekoa izango da.
Azkenik, LAUBURU K.E. IBARRA kadeteak ere aurreko jardunaldian irabazi egin zuten eta aste honetan atsedenaldia tokatzen zaie.