Txapelketako etenaldi berri honen ostean, berriro bertan sartzea tokatzen da, ligako tituluaren lehian jarraitzeko. Bost jardunaldi besterik ez dira geratzen, eta tartean, oporrak direla eta, beste etenaldi bat. Gauzak horrela, partidaz partida, hirunaka gehitzen joan beharko da, azken jardunaldietara irabazteko aukerekin iristeko. Azken hiru jardunaldi hauetan estropezu txikiena ere, garesti ordaindu beharko dugu.
Juananen mutilak, helburuak lortzeko bidean, bere aldetik duten guztia jarriko dutela ziur gaude.
Klubeko beste taldeei dagokienez, hirurak garaipena eskuratu zuten aurreko asteko jardunaldian eta ondorioz, beren txapelketako goiko postuetan kokatuta jarraitzen dute.
Jardunaldi honetan, LAUBURU ALDAZ KLINIKA, emakumezkoen zein gizonezkoen taldeak, atzo bertan jokatu zituzten beren partidak. Olatzen neskak Tolosara hurbildu ziren Teep Samaniego Orixe Tolosaldea taldearen aurka jokatzera 0-7 irabaziz, eta Txubelen mutilak, Donostiako Inter “Eder Kafetegia” taldea jaso zuten Belabietan eta 3 puntuak lortu zituzten 6-3ko emaitzarekin.
Azkenik, Mikelek entrenatzen dituen LAUBURU K.E. IBARRA-ko kadeteak, gaur neurtu dira Tolosan Hirukide Eskolapioak taldearekin. 11:00etan izan da eta 1-8 irabazi dute.