Ibartar gazteak, Laskorainekin puntuetan berdinduta, sailkapenean lidergoa dute berriro aurreko larunbatean Valle del Ebro errioxar taldeari irabazi ostean. Partida hark, hainbat jardunaldietan aurkituko dutenaren ideia izateko balio dezake: oso atzean babesten duten eta kontrara ateratzeko akatsen bila joaten diren aurkariak. Aurreko larunbatean taldeak, egoera horri aurre egiteko, pazientzia eta jokoaren kontrola erakutsi zuen; seguruenik, asteko entrenamenduetan Juananek joko mota hori nabarmenduko zuen.
Jokalari, tekniko eta afizioaren espedizioa Belabieta kiroldegitik aterako da, larunbatean, 15:30ean.
Klubeko kirol informazioarekin jarraituz, lehenengo mailan, Lauburu Aldaz Klinika, gizonezkoen taldeak, aurreko jardunaldian Legorretan 1-6 garbi batez irabazi ostean, ostiralean 20:30ean, jokatuko du partida Belabieta kiroldegian Cecilia fruta denda Kebab Lasarte taldearen aurka.
Lauburu Aldaz Klinika, emakumezkoen taldeak 1-2 galdu zuen Trintxerpe liderraren aurka. Ibartar jokalariek golen aurrean ez asmatzeak, emaitza hobea lortzea ekidin zuen. Ostiralean 20:45ean jokatuko dute derbia Tolosako Uzturpe frontoiean, TEEP Samaniego Orixe Tolosaldea taldearen aurka.
Azkenik, kadeteak atsedena izango dute aste honetan. Aurreko jardunaldian 1-9ko garaipen garbia lortu zuten Hirukide Eskolapioak taldearen aurrean eta sailkapenean bigarren posizioa betetzen dute, Anoeta, liderrak baino partida bat gutxiago jokatuta.