Txubelen mutilak Belabietan jokatuko duten denboraldiko azken neurketa izango da. Denboraldi bikaina izan dute piparrero gazteak eta ongi baino hobeto bukatuko lukete, kategoria honetako Euskal Koparen titulua seigarren aldiz lortuz gero.
Joaneko emaitza 2-1ekoa izan zen beraz, itzulerako partidak tentsioa eta zirrara agintzen du bi taldeen artean.
Txubelek lantalde osoa du eskura eta partida hau ilusio handiarekin ari da prestatzen, jokalariak ere lan handia egiten ari dira, datorren astean Galdakaoko Urreta kiroldegian egon ahal izateko, non 17:30ean Euskal Koparen finala hasiko baita. Beste finalaurrekoan, Bilbok Zierbena jasoko du eta joaneko partidan egindako 5-2ko emaitzari itzulia ematen lan handia egin beharko du Bilbok.
Lehenengo Probintzialeko filialak Nest Zerbezeria taldea jasoko dute ostiralean 20:30ean Belabietan. Ligaren amaierako bi jardunaldi falta direnean, Juanmaren mutilak tituluaren play off-a jokatzea ziurtatuko dien garaipenaren bila joango dira.
Kadeteak larunbatean jokatuko dute, 12:15ean Donostiako Gaska kiroldegian Summa Aldapeta taldearen aurka. Aurreko jardunaldian play off-a ziurtatu ostean, beren zortzigarren partida jarraian irabazten saiatuko dira, horrela, ligako azpitxapelketa ziurtatzeko.
Lauburu Berastegik, ostiralen 22:00etan, nesken kategorian ligako finalera pasea jokatuko du Legorretako Harripila frontoiean. Uzturpe Lauburu, infantilak, larunbatean 9:00etan, liderra den Goierri K.E. taldearen aurka neurtuko dira, Urretxuko Aldiri kiroldegian.