Ibartarrak aurreko jardunaldian, Villa de Murillo, sailkapenean azkena doan taldearen etxean berdinketa egin zuten. Lesioak direla eta, taldea oraindik nahikoa murriztuta dago eta entrenatzaileak berriro jubenilen baza erabili beharko du deialdia osatzeko.
Lauburu, bere azken emaitzen ondorioz (porrota eta berdinketa), sailkapenean seigarren postuan dago 33 punturekin, baina Debabarrena eta Fuenmayor bezalako taldeak hurbiltzen hasiak dira eta dagoeneko partida bateko aldea dute ibartarrekin.
Colo Colo Confort aragoiar taldea, Alfonso Rodríguezek zuzentzen du eta aurreko kanpainako ligaren irabazlea izan zen. Baloi-joko ona du eta erasorako potentzial garrantzitsua; emaitza bikainak lortzen ari da taula-erdiko taldeen aurka baina era berean, goiko postuetan daudenen aurka galtzen du. Iaz antzeko zerbait gertatu zitzaien, ez zituzten emaitza onak eskuratu puntako taldeekin baina beste guztien kontra irabazitako puntuekin liga bereganatzea lortu zuten.
Norgehiagoka zaila izango da, aurkariak partida intentsitate handiarekin hasten du beti eta horren adibide da, aurreko kanpainan Belabietan jokatutako partida; ibartarrak konturatzerako aragoiarrak 0-3 aurreratu ziren. Hala ere, Lauburuk jakin izan zuen emaitza horri itzuli bat ematen eta azkenean 5-3ko garaipena lortu zuten. Gakoa aurkari honek duen hasiera gogorrari eustea eta ikusten diren aukera guztiak aprobetxatzen jakitean dago.
Gogorarazi, partidaren atsedenaldian, ohiko moduan, elkartearen laguntzaileak diren Mahala eta Danon Txokoa tabernaren produktuak zozketatuko direla ikusleen artean eta elkarteko bazkide guztien artean berriz, bi lagunentzako afari baten zozketa egingo da. Azken partidan egindako zozketan, bi lagunentzako afariaren irabazlea Mikel Uribe izan zen. Zorionak!!!