Piparreroak 7 punturekin hirugarren postuan aurkitzen dira, Bilbo eta Laskorainekin berdinduta. Cerverano 10 punturekin buru doa sailkapenean eta Aspil Rivera de Navarra atzetik 9 punturekin. Liga bukatzeko asko geratzen da oraindik baina lehenengo lau jardunaldietan behintzat ez da ustekabekorik izan.
Lehenengo Mailako filialari ere atsedena egokitu zaio aste honetan. Iurre Tabernaren aurka 5-2 galdu ondoren, lehenengo postuari ozta-ozta eta alde handirik gabe eutsi dio, izan ere, Iurre Taberna eta Hirukide Eskolapioak 18 punturekin berdinduta daude segidako postuetan, beraz, puntu bakarreko aldea besterik ez dute tolosarrak eta ibartarrak.
Kadeteak Oñatin Aloña Mendiri irabazi ondoren taularen gorenean aurkitzen dira. Lehenengo sei jardunaldietan bost partida irabazita, 15 puntu lortu dituzte eta igande honetan Intxaurrondoko Mons kiroldegira mugitu beharko dute Inter Fachadas Gipuzkoa taldearen aurka jokatzera, goizeko 9:30etik aurrera.
Berastegi Lauburu nesken taldeak ostiralean jokatuko du Belabietan Eskoriatza K.E. taldearen aurka, 20:45ean. Uzturpe Lauburuko infantilei ere atsedena tokatzen zaie.