Indartsu hasi ziren ibartarrak, jokoa menperatzen. Seguruenik, egin zituzten partiduko minuturik onenak izan ziren. Horrela, bigarren minutuan, Andoniren asistentziarekin Unaik sareetara bidali zuen baloia. Kendutako baloiekin egindako trantsizioek abantaila handitzeko aukera ugari eskeini zuten baina azken metroetako argitasun ezak markagailua mugitzea eragotzi zuen. Piparreroek faltak pilatzen zituzten heinean, etxekoek pixkanaka partiduan sartuz joan ziren eta penalti bikoitz bat medio, lehenengo zatiko azken minutuan berdintasuna lortu zuten.
Atsedenaldia iritsi zen eta emaitza bestelakoa izan behar zuenaren sentsazioa nagusi bazen ere, markagailuak 1-1 soila erakusten zuen.
Bigarren zatian paperak aldatu ziren, ibartarrak baloiak galduz eta pase onak bukatu ezinik ibili ziren, 7 minututan 4 falta pilatu zituztelarik. Santurtzik gainera, lehenengo zutoinera botatako korner batean, aurretik jartzea lortu zuen. Hala ere, zortzigarren minutuan, Cristianek berdintasunera eraman zuen berriro markagailua, Josebak sake luze batetik hasitako jokaldia borobiltzean.
Denbora aurrera zijoan eta bi taldeak nagusitasuna ezarri ezinik eta aukerak borobildu ezinik zebiltzala, 17. Minutuan bertakoak berriro aurreratu ziren markagailuan, banakako ekintza on batekin. Ibarrak atezain-jokalaria atera behar izan zuen eta minutu batetara, berdintasunera iritsi ziren berriro.
Zortea, hala ere, Santurtziren alboan kokatu zen azken minutuan. Karanbola batzuen ondoren nahaspilatutako jokaldi batekin azken tantoa sartu zuten, markagailua 4-3an ezarriz. 40 segundu falta ziren eta markagailuan eragiteko aukera gehiago ez zuten izan piparreroak.
Aurkaria zoriontzea eta lanean jarraitzea geratzen zaigu. Goazen Lauburu!