Zientzia Astearen barruan, Elhuyarrek umorezko bakarrizketa zientifiko laburrez osatutako ekitaldia antolatu du azaroaren 4an, Bergaran. Zientziazale eta dibulgatzaile euskaldun batzuk elkartuko gara, eta guztiok elkarrekin ondo pasatzea da Wolfram deuna! ekitaldiaren helburua.
Bertan egongo diren hizlariak: Ibon Cancio, Koldo Garcia Koldotxu, Josu Lezameta Jozulin, Ines Garmendia, Uxune Martinez, Jon Mattin Matxain Txoni, Amaia Portugal, Idoia Torregarai eta Josu Lopez-Gazpio (ni neu). Aurkezle-gidari lanetan, berriz, Alaitz Ochoa de Erive izango da.
Bergarako udalarekin eta Laboratorium museoarekin batera antolatutako ekitaldia, arratsaldeko 19:30ean izango da, Bergarako udaletxeko pleno aretoan. Guztiok gonbidatuta zaudete (sarrera doan izango da). Wolfram deuna! jai giroan zientziaz gozatzeko aukera aparta izango da eta, horretaz gainera, zientzia.eus webguneak duen atal berriaren aurkezpena egingo da: zientzia-blogak.
Ekitaldiaren izena eta lekua ez dira kasualitatez aukeratutakoak; izan ere, Bergarako seminarioan isolatu zuten Elhuyar anaiek wolframa, euskal zientziak taula periodikoari egin dion ekarpena. Eztabaida handia sortu duen ekarpena, bidez batez. Azkenean, IUPAC Nazioarteko Kimika Elkarteak Elhuyar anaiek elementuari izena jartzeko zuten eskubideari muzin egin zion. Wolframaren sinbolo kimikoa W bada ere, 2005ean bere izen ofiziala tungstenoa izango zela erabaki zuten, eta ez wolframa (beste uneren batean kontatuko dizut historia hori, irakurle). Edonola ere, horrexegatik esaten dugu: Wolfram deuna!
Ekitaldiari buruzko informazio gehiago nahi izanez gero, jarri harremanetan:
Ana Galarraga Aiestaran (Elhuyar Zientzia Unitatearen komunikazio-arduraduna)
tel.: 943 363 040
a.galarraga@elhuyar.com