Bizikidetza ez bedi bixikidatxa, mesedez

Erabiltzailearen aurpegia Iñaki Azaldegi 2018ko eka. 12a, 15:17

Bizikidetza hobetu behar omen da. Ados. Horretarako bi baldintza bete behar direla iruditzen zait: bata, giza-eskubideak urratu dituzten guztiek egindakoa aitortzea, hau da, azken 80 urteotan egindakoak esatea, egia aitortzea; eta bestea, demokrazia aurreratua gauzatzea, hau da, estatu hau plurinazionala eta plurilinguistikoa dela aitortzeaz gain, dagokion legerian jartzea.

Horiek ontzat jotakoan, elkarbizitza errespetuan oinarritua gauzatu ahal izango da, bestela, berriro ere, trantsizioa izan zen diktaduraren amnistiaren antzekoa gertatuko da. ETAk aitortu eta «zinez sentitzen» duela esan du baina beste inork ez. ETA zigortu dute tortura eta kartzelara, eta besteek txintxoarena eta demokratarena egiten jarraituko dute, ezer aitortu gabe estatu terrorismoaz, torturez, presoen sakabanaketak senide eta lagunengan sortzen jarraitzen duen oinaze, diru-galera, zauritu eta hildakoez, diktadura lazgarriaren zikinkeria guztiaz, euskaldunok jasan eta jasaten dugun zokoratze, mespretxu eta bazterketez…

Bi egia horiek aitortu eta dagozkien neurriak hartu gabe, honek viña arcada mailako demokrazia izaten jarraituko du, ardo ondu baten mailako demokrazia izan beharrean, Suitzan, Kanadan, Britania Handian... daukatenaren parekoa.

Bi baldintza horiek bete ezean, gezurrean eta eskubide ezean oinarritutako «bixikidetxa» tristea izango dugu berriro ere, diktadura osoa amnistiatu zenetik daukagun mailakoa, Don Simon ardoaren mailakoa, Konstituzioaren lehendabiziko orriak irakurrita garbi geratzen den moduan, inork lan hori hartu nahi badu, zer esanik ez 155. artikulua arte iritsi nahi badu.

Helburu politiko guztiek egingarri izan behar dute demokrazia heldu eta taxuzko batean, eta hortik sortuko da bizikidetza sano eta errespetuzkoa, bestea orain artekoa izango da, zapaltzailearen konstituziopeko «bixikidetxa», handiak txikiari «izorrai» esaten dion horietakoa. Niri errespetuzkoa ikaragarri interesatzen zait, bestea bat ere ez, lehengoan jarraitzea baita, espainolak eskubide guztien jabe eta herri txikia azpian, menperatua, hizkuntza barne.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!