Honela, ikasle batek ariketa ongi eta erraz egiten badu, gustatu egingo zaio eta gehiagotan egin nahiko du, gero eta gehiago praktikatu emaitza positiboagoa izango da. Aldiz, proposatutako ariketarekin ez bada moldatzen, emozio ezkorra sortuko zaio eta beraz, ez du ariketa egin nahiko; gero eta gutxiago praktikatzen badu, orduan eta emaitza kaxkarragoa izango da.
Ildo honi jarraituz, ikasleek hain presente izaten dituzten azterketak daude. Azterketek emaitzekin lotuta daude eta emaitzak berak ikaslearen emozio baikor edo ezkorrarekin. Bide honetan, exijentziak azalduko dira eta honen atzean gaizki egitearen beldurra. Beldurrak bigarren emozio batean eragina izango du, urduritasuna. Honen ondorioz, ikasle batzuk azterketaren aurrean galdera batean kateatuta geratzen badira, urduri jartzen dira eta nahiz eta hurrengo galderak erantzuten jakin ez dira gai izango ongi erantzuteko edo dakiten adina luzitzeko, emaitza kaxkarrak sortzen duen tentsioagatik eta urduritasunagatik.
Zer-nolako laguntza eskaini dezakegu, etxean zein eskolan?
Etxean emozioen lanketa egitea garrantzitsua da, emozio bakoitzari bere izena jartzea, alegia. Gurasoak lasaitasuna transmititu behar du eta exijentziak alde batera utzi. Irakasleekin harremanetan egotea ere garrantzitsua da, ikasleak sentitu dezala denak berari laguntzeko daudela eta azterketan dagoenean irakaslearen laguntza edukiko duela. Puntu honetan, garrantzitsua da irakasleak bermatzea ikasleak galdera guztiak ulertu dituela eta horrela ez bada, esplikatuko dizkiola. Behin emaitzak jasotakoan, egokia da azterketa ikustea eta hanka zertan sartu den eta zer hobetu daitekeen lantzea.
«Emozioak landuz gero, emaitzak hobeak izango dira eta baita ikasle horren autoestimua eta motibazioa ere»
Amaitzeko, ikasketa prozesuan alderdi emozionala lantzeak alderdi akademikoa bezain garrantzitsua da eta biak eskutik hartuta doazen prozesuak dira. Beraz, emozioak landuz gero, emaitzak hobeak izango dira eta baita ikasle horren autoestimua eta motibazioa ere.