Gipuzkoako Herri Kirolen Federazioak antolatuta eta Zestoako Udalaren laguntzarekin, Gipuzkoako Sega Txapelketa jokatu zuten larunbatean Aizarnan. Aranburu landetxearen pareko belardian egin zuten saioa, eta hiru emakume eta lau gizon aritu ziren nor baino nor.
Emakumeetan, Alaitz Imaz, Malou Henriksen eta Ainara Otamendi lehiatu ziren; Ainhoa Mazkiaran ere parte hartzekoa zen, baina azkenean ezin izan zuen bertaratu. 400 metro koadro belar ebaki behar izan zituzten hiru segalariek, eta Imaz izan zen lan horiek egiten azkarrena; 23 minutu eta 31 segundo behar izan zituen. Haren atzetik sailkatu zen Otamendi, 27 minutu eta zazpi segundoko denborarekin. Henriksenek eskuratu zuen hirugarren postua, 28 minutuko eta hamar segundoko denborarekin.
Gizonetan, Julen Gabirondok, Jon Otegik, Mikel Lizartzak eta Iñigo Mercaderrek neurtu zituzten indarrak. Haiek mila metro koadro belar ebaki behar izan zituzten, eta aise gailendu zen Gabirondo; 35 minutu eta bederatzi segundo behar izan zituen lanak amaitzeko. Haren atzetik, Lizartzak eta Mercaderrek amaitu zituzten lanak; batera samar bukatu zituzten egin beharrekoak, eta ez zen argi gelditu nork eskuratu zuen bigarren postua. Dena den, epaimahaiak adierazi zuen Lizartzak lehenago bukatu zuela proba, bi segundoko aldeagatik; 38:40 denbora egin zuen hark, eta 38:42 Mercaderrek. Azkenik, Otegik eskuratu zuen laugarren postua, 43:12 denborarekin.
Argazkiak: IHINTZA ELUSTONDO