Elkarrizketa

"Ez dago Donostia baino leku hoberik antolatu nahi duguna egiteko"

Erabiltzailearen aurpegia
Argazkia: JOSEBA PARRON SAN SEBASTIAN

Emakume Pilotarien Elkartea (EPE) proposamen berezi batekin joan zen pasa den apirilean udalera: emakume pilotarien Donostia Saria sortzea, goi mailako emakume pilotarien eskuzko eta palazko txapelketa. Maider Mendizabal (Anoeta, Gipuzkoa, 1977) palazko pilotari beteranoa izan zen proposamena aurkeztu zuenetako bat, EPE-ko zuzendaritzako kide baita. Dioenez, Donostia «leku ezin hobea» da horrelako txapelketa bat antolatzeko. Horrez gain, emakumeen pilotaren egoerari buruz ere hausnartu du.

Emakume pilotarien txapelketa handi bat antolatu nahian zabiltzate, baina zergatik Donostian?

Alde batetik, EPE-ko kide gehienak gipuzkoarrak garelako. Horrez gain, Gipuzkoako hiriburua delako, eta pilotarekin izugarrizko lotura daukalako. Pilota garrantzitsua izan da beti Donostian, XX. mendeko erraketistetatik hasita.

Guk ere pilotan jokatzen dugula ezagutaraztea eta emakumeen pilotan ere maila dagoela erakustea da proposatutako txapelketaren helburua, eta hain zuzen, horretarako agertoki ezin hobea iruditzen zaigu Donostia.

Donostian emakumeen pilotak izandako hainbat mugarri nabarmendu zenituzten proposamenean.

Emakume erraketistetatik, besteak beste, Emakumea Pilotari proiektura arte. Gipuzkoako Euskal Pilota Federazioak 2004an sortu zuen proiektu hori, eta duela gutxi arte funtzionamenduan izan da. Nahiko talde itxurosoa bildu ginen proiektuaren bueltan, eta Gipuzkoako herri nagusienetako seitan garatu genuen, sustapen eta aisialdi jarduerak egiten. Sei herri horietako bat Donostia izan zen. Esaterako, haurrentzako paleta eskola bat sortu nahi izan genuen hemen, baina ezin izan genuen. Interesa zuten neska asko aurkitu genituen, baina zailtasun handiak izan genituen entrenamenduetarako egunak eta orduak zehazteko. Hala ere, aisialdi taldea sortu genuen, eta 60 emakume etorri ziren lauzpabost urtez. Ondoren, hainbat faktore direla medio, taldea txikitzen joan da, eta gaur egun 25 bat emakume elkartzen dira astero.

Bestalde, pilotari federatuontzako ere garrantzitsua izan da beti Donostia, hainbat txapelketatako finalak Atanon jokatu izan ditugulako: Gipuzkoako txapelketakoak, Emakumea Pilotari proiektukoak, eta abar. Horrez gain, Gascako trinketea urte luzez erabili dugu; berritu egin zuten arte, orain kaka bat da eta. Ez dago Donostia baino leku hoberik antolatu nahi duguna egiteko.

Zein frontoitan jokatuko zenukete txapelketa?

Frontoi txiki batean, Antiguakoan. Hemengo frontoi nagusia Atano da, eta oso ondo dago, baina ez da erraza betetzea, eta guretzako luzeegia da. Neskok ondo jokatzen dugu eta erreboteak egiten badakigu, baina frontoi luze batean ez gara iristen. Frontoi txiki batean, ordea, bai. Eta errebote bat ondo egiten eta ekartzen duzunean, jendea liluratuta gelditzen da. Azken finean, guk gauzak modu ezberdin batean egin behar ditugu.

Jarraitu irakurtzen Irutxuloko Hitza-n

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!