Gipuzkoako Binakako Aizkora Txapelketa jokatu zen igande eguerdian Aiako probalekuan, punta-puntako sei aizkolariren artean, eta emaitza ere halakoxea izan zen. Lehia borrokatua eta estua. Bikote bakoitzak sei kanaerdiko eta sei hirurogei ontzako enborrak moztu behar izan zituen; hau da, lehenik hiru kanaerdiko, gero sei hirurogei ontzakoak eta, amaitzeko, beste hiru kanaerdiko. Lanak egiten bikote azkarrena Julen Alberdi Txikia IV.a azkoitiarrak eta Jexux Mari Mujika ibartarrak osatutakoa izan zen, 21 minutu eta 59 segundorekin.
Eneko Otaño beizamarra eta Ugaitz Mugertza mutrikuarra izan ziren bigarren, 22 segundo eskasera; hauen denbora 22 minutu eta 21 segundokoa izan zen. Hirugarren, azkenik, Mikel Larrañaga azpeitiarrak eta Iñaki Azurmendi beasaindarrak osatutako bikoa sailkatu zen, irabazleengandik minutu erdira, 22 minutu eta 29 segundo eginez.
Txapelketa ikusgarria izan zen, ikusteko polita eta benetan lehiakorra. Bertaratu direnek gozatu ederra hartu zuten kirolariek eman zuten mailarekin eta erakustaldiarekin.