Hilabeteetako lanen ostean, prest dute Azkoitiko eguneko zentro berria. Burdinoleta kaleko zentroaren irekiera ekitaldian, besteak beste, Eider Mendoza diputatu nagusiak, Maite Peña Zainketa eta Gizarte Politiketako diputatuak eta Ana Azkoitia Azkoitiko alkateak parte hartu dute. Han izan dira egungo zentroaren erabiltzaileak eta haien familiakoak, baita Garbiñe Otegiren senideak ere. Izan ere, eguneko zentro berriari Alegiako Galarreta baserriko Garbiñe Otegi izena jarri diote. Otegi Azkoitiko bizilaguna zen, eta iaz hil zen istripu batean. Lanbidez arkitekto teknikoa zen, Gipuzkoako Foru Aldundian jarduten zuen, eta Azkoitiko eguneko zentroaren diseinuan eta sustapenean funtsezko lana egin zuen. Zentroari bere izena jarrita omenaldia eta aitortza egin nahi izan dizkiote Otegiri, Gipuzkoako gizarte zerbitzuak hobetzeko izan zuen konpromisoaren lekuko.
Argazki galeria eta informazio gehiago Azkoitiaguka.eus webgunean.